DILI, 17 jullu 2023 (TATOLI)—Preparasaun atividade Jornada Nasionál Juventude (JNJ) ne’ebé sei realiza setembru 2023 iha Letefoho, munisípiu Ermera, daudaun ne’e atinje ona 75%.
“Atinjimentu kona-ba fiar ne’e 100%, maibé preparasaun fízikamente Jornada Nasionál Juventude ne’ebé sei realiza iha Letefoho Ermera iha fulan setembru tinan ne’e atinje ona 75% no tuir alvu sei ramata iha fulan agostu nia-laran, tanba setembru ne’e atividade hahú la’o ona,” Diretór Ezekutivu Juventude Katólika Arkedioseze Dili, Padre Cirílio dos Santos Maia, informa ba Agência Tatoli, iha edifísiu Agência Tatoli, segunda ne’e.
Atividade ne’e sei foti tema kontinuasaun hosi JMJ Lisboa Portugal ‘Maria hit-an lalais’, ho sub-tema ‘halo tuir buat ne’ebé nia haruka’.
Notísia relevante : JMJ Lisboa manifesta fé no fraternidade umana
Nia hateten, iha festa JNJ Letefoho tinan ne’e, tuir orientasaun komisaun organizadora peregrinante sira ne’ebé sei partisipa hosi parokia hamutuk 34 Arkidiseze Dili nian, ho ema hamutuk 565 tanba sei reprezenta ema na’in-haat hosi kada Parokia maibé peregrinante hotu ne’ebé sei partisipa hamutuk 900.
“Ida-ne’e la inklui Vigáriu Ermera, maibé tuir alvu peregrinante hamutuk 900, maibé konta ho sarani seluk ita iha partisipante 1.000 ba leten,” nia akresenta.
Atividade JNJ iha Letefoho tinan ne’e sei hala’o durante semana ida, hahú hosi loron 08 to’o 14 setembru 2023.
Antes to’o loron 14 setembru, iha loron 08 setembru peregrinante sira sei hamutuk ho Parokia sira hosi Dili, Maliana no Baucau hodi konsentra misa iha Gleno hotu sei fahe peregrinante sira ba Parokia sira iha munisípiu Ermera, ho programa vizita pastorál hodi hala’o atividade espirituál ninian.
Peregrinante sira sei halo vizita pastorál iha fatin haat hanesan Parokia Ermera nian sei vizita Ramerhein no Estadu, enkuantu Parokia Letefoho sei vizita Eraulo no Goulolo.
“Nune’e atividade vizita pastorál ne’e sei ramata iha loron 10 setembru, ne’ebé sei enserra iha Guololo, hotu mak ita hamutuk ho peregrinante sira ba Letefoho hahú hosi loron 11-14 ne’e preprasaun ba enseramentu JNJ entrega Kruz Joven hosi Parokia Letefoho ba Parokia Laleia Dioseze Baucau,” nia tenik.
Jornalista : Arminda Fonseca
Editora : Julia Chatarina
