DILI, 22 jullu 2023 (TATOLI)—Polísia Nasionál Timor-Leste (PNTL) daudaun ne’e asegura ona suspeitu na’in-haat relasiona ho kazu tuda ema iha área Amular, suku Becora, munisípiu Dili.
“Daudaun PNTL asegura ona ema na’in-haat hodi submete ba prosesu identifikasaun iha Eskudra Cristo Rei,” Komandante Eskuadra Cristo Rei, Inspetór Duarte Abílio, informa ba Agência Tatoli, via telefónika, sábadu ne’e.
Notísia relevante : PNTL detein tan suspeitu na’in-lima ba kazu tuda kanek membru F-FDTL
Maski nune’e, Komandante Eskuadra Cristo Rei seidauk bele fó komentáriu kle’an kona-ba kazu ne’e tanba seidauk hetan relatóriu hosi parte investigadór no kazu ne’e sei iha hela prosesu nia laran.
Kazu ne’e akontese iha sádadu (22/07) madrugada maizumenus tuku 01:00, iha joven na’in-haat hapara no tuda ema iha área Becora, ne’ebé sira-nia asaun ne’e hatudu iha gravasaun CCTV no daudaun espalla iha rede sosiál.
Bainhira sidadaun ida liu área Becora, hetan tuda hosi joven na’in-haat hodi rezulta sidadaun ne’e ho kondisaun grave no daudaun halo hela tratamentu iha Hospital Nacional Guido Valadares (HNGV).
Haree ba hahalok sidadaun sira ne’e, PNTL liuhosi Servisu Informasaun Polísia (SIP) buka tuir kedan sidadaun sira hodi konsege hetan no asegura.
Jornalista : Natalino Costa
Editora : Julia Chatarina
