DILI, 26 jullu 2023 (TATOLI)—Prezidente Komisaun Le’e Ziaval, Novis Risamoto, hateten uma tipikál Lautém sei lansa iha fulan-agostu ka setembru tinan ne’e.
Notísia Relevante: Le´e Ziaval : Komisaun tarde SEAK foti
“Planu lansamentu primeira pedra ne’e, komisaun sei realiza iha agostu ka setembru nia-laran. Komisaun organizadora nia planu sei konvida Governu hodi akompaña no haree, nune’e bele aloka mós iha Orsamentu Jerál Estadu 2024 nian,” nia hateten ba Agência Tatoli iha edifísiu TATOLI, Faról, kuarta ne’e.
Prezidente Le’e Ziaval hatutan, dezde ahi-han uma tradisionál ne’e to’o agora seidauk konstrui fila-fali tanba komisaun iha diápora halo transeferénsia osan atrazadu no enjiñeiru sira mós okupadu hotu ho sira-nia servisu, maibé agora enjiñeiru sira halo ona nia dezeñu uma ne’e no hein lansa iha tinan ne’e.
“Maibé, ida-ne’e ita ko’alia ona ho ita-nia autoridade Lautém nian hodi halo mobilizasaun, nune’e prepara ba lansamentu ne’e. Nune’e mós, Komisaun Le-Ziavál iha diáspora haruka osan mai ne’e $2.000-resin, maibé ida-ne’e uza ba operasaun nian. Aproveita ho biban ne’e, ha’u atu hateten de’it katak informasaun ne’ebé espekula iha média dehan ho osan $8.000 ne’e la lo’os. Osam ne’ebé aloka hosi diáspora ne’e asegura hela iha banku no ami Komisaun la uza ka estraga. Ne’e foin kontribuisaun hosi Lautém-oan sira iha diáspora no Komisaun sira iha rai-laran sei halo kontribuisaun mós,” nia hateten.
Hosi osan ne’e, nia hateten, komisaun organizadora uza ona balun hodi konvoka enkontru ho parte autoridade lokál no lian na’in sira hodi realiza konstrusaun uma lisan Le’e Ziaval ne’e.
“Tuir komisaun nia estimasaun osan ba konstrusaun Le’e Ziaaval ne’e presiza $70.000-$80.000 no ida-ne’e la inklui ba Jardin, uma mahon no moru sira,” nia dehan.
Asuntu ne’e, nia dehan, Komisaun Organizadora Le’e Zaval sei hasoru malu ho Governu, liu-liu parte Sekretáriu Estadu Arte no Kultura nian, hodi aseleira prosesu konstrusaun uma tipikál ne’e.
“Iha tinan kotuk, komisaun hato’o ona nia pedidu ba Sekretáriu Estadu Arte no Kultura sesante, Teófilo Caldas, no halo audiénsia mós ho nia. Ikus mai ami simu informasaun katak ami-nia proposta pasa maibé to’o dalan klaran rezeita fali no ami lahatene nia kontinuasaun to’o agora,” nia esplika.
Komisaun Organizadora iha komitementu nafatin hodi esforsu atu realiza konstrusaun mezmu Governu planu atu halo. maibé Komisaun Organizadora Le’e Ziaval iha kbi’it no forsa nato’on atu halo, tanba ne’e rekomenda no husu ba Governu foun ne’e se bele tau osan ba konstrusaun uma tradisionál Leziaval ne’e.
“Tanba uma kultura ne’e ikon Timor-Leste nian mezmu iha Lautém, maibé ida-ne’e uma tipikál Lautém ne’ebé importante ba Lautém-oan atu esforsu hodi aseleira ninia konstrusaun,” nia hateten.
Notísia Relevante: SEAK seidauk fó apoia ba uma tradisionál Leiaval
Jornalista : Osória Marques
EDitór : Cancio Ximenes
