Konflitu iha Luro rezulta ema ida mate, PNTL kaptura suspeitu sira
LAUTEIN, 24 Outubru 2026 (TATOLI) – Komandante Polísia Nasionál Timor-Leste (PNTL) Munisípiu Lautein, Superintendente Xefe Polísia António Rego Fernandes, informa katak insidente asaltu malu ne’ebé akontese iha sesta-feira, 23 Outubru 2026, pur volta tuku 17h00 lokraik, iha Postu Administrativu Luro, rezulta vítima ida mate no ema na’in-rua seluk kanek.
Nia esplika katak vítima sira ne’ebé hetan kanek mak Francisco Vila Nova, ne’ebé hetan kanek kmaan, Eusébio, ne’ebé kanek todan no Silo ho kanek grave no ikus hakotu iis.
“Atuasaun Polísia iha fatin akontesimentu, kontaktu kedas ambulánsia hodi transporta vítima sira bá Ospitál Rejionál Eduardo Ximenes Baukau, maibé vítima Silo hakotu iis iha dalan. Enkuantu Eusébio to’o agora kontinua hetan tratamentu iha Ospitál Baukau”, Komandante ne’e hatete ba jornalista sira iha Com, sábadu, ne’e.
Relasiona ho kazu mate, Servisu Investigasaun Kriminál hamutuk ho Polísia Eskuadra Postu Luro halo kedas koordenasaun ho família matebian, hodi transporta mate-isin bá Ospitál Nasionál Guido Valadares (HNGV, sigla portugés), Dili, atu submete ba prosesu autópsia.
António Fernandes konfirma katak família matebian konkorda ona atu hala’o autópsia, no autoridade sira kontinua hein rezultadu hodi determina kauza mate.
“Suspeitu sira ita kaptura kedas iha kalan ne’ebá, ho flagrante delitu, no asegura ona iha sela detensaun Komandu Munisípiu Lautein”, nia dehan.
Komandante relata katak konflitu ne’e hahú husi provokasaun entre pesoál no pesoál, ne’ebé ikus-mai hamosu asaltu malu no rezulta vítima balun mate no kanek.
Polísia deskonfia vítima mate tanba hetan sona. Nune’e, Komandu Polísia Munisípiu Lautein konsidera kazu ne’e hanesan omisídiu agravadu no kazu arma-branka.
“Tuir informasaun, tanba sona, nune’e kazu ne’e ita konsidera hanesan omesídiu agravadu no kazu arma-branka,” António afirma.
Nia hatutan, to’o agora Polísia seidauk simu relatóriu kompletu husi ekipa iha terrenu kona-ba fatin loloos ne’ebé vítima hetan sona.
“Ha’u seidauk hetan relatóriu serteza husi terrenu. Maibé, ita haree raan sai maka’as husi nia isin. Ita hein prosesu autópsia, depois mak ita bele hatene fatin ne’ebé nia hetan sona no kauza mate,” nia informa.
Komandu Polísia Munisípiu Lautein entrega ona kazu ne’e ba Servisu Investigasaun Kriminál atu kontinua prosesu, inklui hein rezultadu autópsia hodi klarifika sirkunstánsia no kauza mate.
Tuir identifikasaun inisiál husi polísia, kazu ne’e envolve membru arte-marsiál sira no sidadaun sira ne’ebé la’ós membru arte-marsiál.
Jornalista: Hortêncio Sanchez
Editora: Maria Auxiliadora
