Autoridade polisiál detein ona suspeitu ba kazu omisídiu Elemloi

DILI, 31 jullu 2023 (TATOLI) – Polísia Nasionál Timor-Leste (PNTL) liuhosi ekipa konjunta kompostu husi Departamentu Investigasaun Kriminál (DIC), Departamentu Informasaun Polísia (DIP), Unidade Espesiál Polísia (UEP) no Unidade Falintil (UF) ezekuta mandadu detensaun hosi Tribunál hodi detein suspeitu ho insiál HSM envolve iha kazu oho Isac Sinarai iha área Elemloi, Delta III, Suku Comoro, Postu Administraivu Dom Aleixo, Munisípiu Díli.
Ekipa konjunta iha loron 31/07/ 2023 maizmenus tuku 14:14 oras, ezekuta mandadu-detensaun ho NUC : 0002/23. PNSIC, hodi detein suspeitu ho insiál HSM iha nia rezidénsia Maskarinas, Aldeia 04, Suku Maskarinas, Postu-Administrativu Vera-Kruz, Munisípiu Dilí.
Bainhira ekipa konjunta asegura tiha suspeitu ne’e, ekipa lori kedan suspeitu ba Derpartmentu DIK Komandu Jerál PNTL hodi submete ba identifikasaun, molok detein suspeitu iha sela-detensaun Komandu PNTL Munisípiu Díli durante oras 72 nia-laran, hafoin aprezenta ba Tribunal, Judisiál Primeiru Instánsia Dílí hodi submete ba iha primeiru-interrogatóriu.
Xefe DIK Superientendente Polísia, João Belo dos Reis, hateten PNTL hamutuk ho servisu informasaun polísia buska suspeitu nia paradeiru.
“Ami simu mandadu detensaun hosi Tribunál, ohin dader no ami ezekuta mandadu ne’e, hodi detein suspeitu, ne’ebé dekonfia envolve kazu Elemoli no supeitu ne’ebé ita ohin detein ne’e, liga ba ligasaun ba kazu Elemloi”, João Belo hateten ba jornalista sira iha Komandu Jerál PNTL Caicoli, segunda, ohin.
Nia dehan, PNTL prosesa kazu ne’e kle’ur tanba ne’e iha segunda (31/7) ohin PNTL bele detein ona suspeitu ba kazu ne’e.
“Bazea ba deklasaun testamuña ba kazu ne’e. Fó informasaun no ita rekolla ita indika katak nia mak suspeitu ne’ebé ita buka maibé sei buka tuir sira seluk ne’ebé envolve mós ba kazu ida ne’e”, nia salienta.
“Mandadu ne’ebé mak ohin ami simu ne’e halo detensaun ba suspeitu ida, maibé ami sei buka tuir tán suspeitu sira seluk tanba prosesu sira sei lao hela no tuir evidénsia”, nia dehan.
Nia adianta, PNTL sei aprezenta suspeitu HSM ba Ministériu Públiku hodi kontinua prosesa ba oin.
Notísia relevante : PNTL identifika ona paradeiru supeitu ba kazu Elemloi
Jornalista: Natalino Costa
Editór : Zezito Silva

