Ferias judisiál, Tribunál Oé-Cusse funsiona parsialmente

OÉ-CUSSE 02 agostu 2023 (TATOLI) – Juiza Judisiál Primeira Instánsia, Florência Freitas, hateten, hahú fulan agostu to’o setembru 2023, Tribunál hahú ferias judisiál, maibé atendimentu iha Tribunál Oé-Cusse sei funsiona parsialmente hodi atende de’it kazu sira-ne’ebé importante no urjénsia.

“Agora tama ona ba ferias hahú tersa horisehik, entaun ita sei funsiona parsialmente, agora ha’u rasik mak iha-ne’e tanba juiz rua, ami fahe ona orariu, juiz turnu mak tenki asegura durante ferias judisiál, atende de’it kazu sira-ne’ebé importante de’it ka urjente,” Juiza Florência Freitas, ba Tatoli iha Tribunál Oé-Cusse, kuarta ne’e.

Nia esplika, kazu sira-ne’ebé konsidera importante no urjente maka hanesan primeiru interrogatóriu, sumariu sira no prosesu importante sira, ne’ebé maka ligadu ho prezu detensaun ne’e, tenke liberdade só juiz mak bele hasai sira-nia liberdade, no kazu urjente sira seluktán.

“Kazu la’os normál hanesan anteriór, só ami simu kazu urjente de’it, primeiru interrogátoiu maka krime ida-ne’ebé julga hosi tinan tolu ba leten, sumariu sira-ne’e, bainbain baku malu, ida-ne’e maka tama prosesu sumariu bele julga, maibé haree mak la importante, Ministériu Públiku mak sei aplika de’it TIR depois mai ho prosesu normál,” nia esplika.

Alende ne’e, iha mós kazu ida-ne’ebé tau importánsia ne’e, maka liuliu juiz ida daudaun ne’e sei dezloka ba Portugál hodi hala’o formasaun durante fulan neen, entaun sei asegura fali hosi juiz seluk.

Nune’e kazu sira-ne’ebé kontinuasaun ho juiz ne’e, tuir direitiva tribunál nian, tenke termina antes nia dezloka, entaun alende nia julgamentu maka iha, tenke termina hotu.

“Ne’ebé ohin sei laiha julgamentu, aban no bairua sei julga-tán fila-fali, kazu ida normál, tanba antes ami julga ona, agora ba kontinuasaun, atu evita nia kontinuasaun ne’e labele to’o fali fulan neen, tanba tuir lei prazu ninian ne’e limitadu, kuandu produs iha loron 30 nia laran, maibé liuhosi ne’e, lakon prova nia efetu laiha no tenke produs fila-fali, entaun ami tenke kontinua halo julgamentu iha dentru loron 30 nia laran hodi hetan nia desizaun iha loron 15,” nia katak.

Nia informa, ferias judisiál ne’e hahú hosi loron 01 agostu to’o loron 15 setembru 2023, 16 no 17 monu iha sabadu no domingu, entaun Tribunál funsioná normál iha 18 setembru 2023.

Notísia relevante: Tribunál hahú férias judisiál, julgamentu ba de’it kazu urjente

Jornalista: Abílio Elo Nini

Editor: Evaristo Soares Martins