MALIANA, 02 agostu 2023 (TATOLI) — Provedór Direitu Humanu no Justisa (PDHJ), Virgílio da Silva Guterres ‘Lamukan’, sei hatutan preokupasaun membru Polísia Nasionál Timor-Leste (PNTL) iha baze ba Ministru Interior, Francisco Guterres.
Nia dehan, dutrante ne’e Parlamentu Nasionál aprova orsamentu osan boot maibé durante ne’e PNTL sei hasoru difikuldade barak tanba laiha kombustível ba karreta patrullamentu.
Nune’e mós laiha kazerna ba membru sira atu hela ho família liuliu ba sira-ne’ebé muda hosi fatin ida ba fatin seluk.
“Asrama ne’e tenke iha, ida-ne’e provedór kompromete atu halo advokasia iha tempu badak hodi hasoru malu ho Ministru Interior,” Provedór Virgílio hato’o asuntu ne’e durante hala’o enkontru kortezía ho autoridade munisipál Bobonaro iha salaun administrasaun munisipál Bobonaro, tersa ne’e.
Nia parte mós hato’o ona ba Parlamentu Nasionál (PN) iha debate Orsamentu Jerál Estadu (OJE) 2024 atu tau orsamentu sufisiente ba ministériu ne’ebé PNTL tutela ba nune’e membru sira bele halo serbisu ho dignu.
Nune’e mós provedór halo ona vizita ba postu polísia iha Mota-Masin, Salele, munisípiu Covalima, haree katak membru PNTL balun hatais uniforme tuan no nakles.
“Sira hateten ba provedór katak, dalaruma ami, sira sorin ne’e konvida ami ba halo formatura, iha formatura ne’e ami-nia farda ne’e ami senti la PD (Percaya Diri) ida, ne’e ha’u-nia laran kanek dehan hanesan ne’e, ita moe ba ema seluk sei di’ak, ita moe ba Indonézia labele, ne’e pekadu ida Maromak mós labele perdua tanba ita husik ita-nia povu moe iha povu Indonezía nia oin,” provedór preokupa.
Jornalista: Sérgio da Cruz
Editór: Evaristo Soares Martins
