DILI, 03 agostu 2023 (TATOLI)—Asosiasaun Chega ba ita (ACbit) simu subvensaun $5.000 hosi Centro Nacional Chega, Institutu Públiku (CNC, I.P) hodi kapasita sobrevivente feto sira hosi konflitu pasadu iha área negósiu.
Inisiativa ne’e realiza ho baze asina nota entendimentu hosi parte rua, nune’e ba oin bele serbisu hamutuk hodi implementa atividade hosi Komisaun Akollimentu, Verdade no Rekonsiliasaun (CAVR, sigla portugés) no Komisaun Verdade no Amizade (CVA, sigla portugés) atu haree ba apoia sobrevivente hosi konflitu pasadu, liu-liu kapasitasaun ba grupu sobrevivente sira hodi hadi’a sira-nia moris.
“Ami asina nota entendimentu ho CNC, I.P iha loron 01 agostu hodi simu subvensaun hamutuk $5.000 hodi fó formasaun ba ita-nia sobrevivente feto sira iha área negósiu, oinsá sira bele introdús rendimentu uma-kain hodi sustenta sira-nia moris, ” Diretora ACbit, Manuela Leong Pereira, informa ba Agência Tatoli, via telefónika, kinta ne’e.
Notísia relevante : ACbit realiza semináriu reforsa ekonomia feto sobrevivente iha Baucau
Asosiasaun identifika grupu sobrevivente hamutuk 25 iha tinan ne’e, ne’ebé hosi númeru ne’e konsege apoia ona grupu lima hosi Rejiaun Administrativa Espesiál Oé-cusse Ambeno (RAEOA), Ermera, Dili, Ainaro no Baucau, hodi hala’o atividade negósiu hanesan kréditu osan, haki’ak animál, soru-tais no kuda modo.
ACbit durante ne’e halo atividade apoia sobrevivente hosi konflitu pasadu iha área negósiu no serbisu hamutuk ho parte saúde hodi apoia vítima sira asesu tratamentu saúde, inklui serbisu hamutuk ho CNC, I.P hodi harii uma ba sobreviente sira.
Jornalista : Arminda Fonseca
Editora : Julia Chatarina
