iklan

DILI, HEADLINE

KRAM hein kalendáriu graduasaun ba membru foun PSHT

KRAM hein kalendáriu graduasaun ba membru foun PSHT

Logotipu KRAM

DILI, 04 agostu 2023 (TATOLI) – Prezidente Komisaun Reguladór Arte Marsiál (KRAM) Octavio da Conseição, ko’alia ona ho organizasaun Persaudaraan Setia Hati Terate (PSHT) Timor-Leste hodi haree ba kalendáriu graduasaun ba membru foun PSHT hamutuk 10161.

“Ami ko’alia buat hotu los ona, iha tempu besik PSHT hato’o de’it kalendáriu mai ami haree hodi hasai pareser ida hodi fó autorizasaun ba sira bele halo atividade graduasaun iha semana ne’e ou semana oin”, Prezidente KRAM dehan ba jornalista-sira iha Lecidere Dili, sesta ne’e.

Nia dehan, laiha ona dezentendimentu iha PSHT nia-laran ho nune’e organizasaun ne’e bele hala’o atividade ho avontade no koopera ho parte seguransa hodi asegura.

Iha fatin hanesan, Prezidente PSHT Baltazar Lemos Seixas, hatete preparasaun ba graduasaun la’o di’ak tebes no tempu besik aprezenta ona kalendáriu fiksu ba KRAM.

“Ami-nia preparasaun la’o kapas tebes, buat hotu la’o di’ak ona hein de’it realiza graduasaun ba membru foun sira”, Baltazar dehan.

Graduasaun ba membru hirak ne’e sei hala’o fatin ualu, Dili sei hala’o iha Tibar, Munisipiu Liquiça, Covalima, Oe-Cusse, Ainaro, Manufahi, Aileu, Baucau no Bobonaro.

Ema ne’ebé sei mai fó graduasaun ba membru foun hirak ne’e mai hosi Indonézia hamutuk na’in 111 no sei to’o iha tempu besik.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!