Ekipa avaliadór sujere ba UNPAZ hadi’ak website no rekruta tan funsionáriu

DILI, 09 agostu 2023 (TATOLI) – Kursu Jetaun no Kontabilidade iha Universidade da Paz (UNPAZ) hetan ona avaliasaun husi ekipa avaliadór nasionál no internasionál sira husi Ajénsia Nasionál Avaliasaun no Akreditasaun Akadémika (ANAAA). Iha avaliasaun ne’e ekipa rekomenda ba instituisaun atu atualiza software ne’ebé universidade uza, hadi’ak website no aumenta rekursu umanu ba serbisu Internal Quality Assurance (IQA).

Reitór UNPAZ, Adolmando Amaral, dehan sujestaun sira ne’ebé ANAAA hato’o ne’e pertinente maski iha buat balun ladún reflete ba kondisaun reál ne’ebé maka universidade iha Timor-Leste hasoru, maibé UNPAZ sei kumpre rekomendasaun sira ne’e.

Dirijente universidade salienta katak ekipa avaliadór sira husu atu UNPAZ tenke moderniza website, tanba durante ne’e programa hotu universidade nian tau iha website ne’e no nia publikasaun sira foin iha lian tetun no portugés, nune’e tau mós inglés atu ema seluk bele akompaña dezenvolvimentu UNPAZ nian kada loron. Atualiza mós software, tanba liu tinan lima ona, nune’e update ba sistema foun hodi bele fasilita di’ak liután serbisu universidade nian, liuliu atividade iha kursu Jestaun no Kontabilidade.

“Hadi’a jestaun iha serbisu International Quality Assurance nian tanba funsionáriu barak iha IQA ne’e la hatene inglés. Dalabarak susar atu halo komunikasaun ho ekipa painél internasionál sira, tanba ne’e sira husu atu funsionáriu sira ne’ebé serbisu iha IQA ne’e tenke balansu, signifika UNPAZ tenke rekruta tan funsionáriu ne’ebé hatene lian inglés”, realsa.

Lembra katak kursu Empreendedorizmu iha UNPAZ mós hetan ona avaliasaun husi ANAAA no rekomenda atu buka parseiru (stockholder) ba kursu refere.

Adolmando Amarak esplika katak kooperasaun ho parseiru sira ne’e ho intensaun atu loke espasu ba estudante finalista sira bainhira atu halo sira-nian prátika ruma karik labele hetan difikuldade, signifika UNPAZ ninia parseiru sira bele fasilita espasu atu estudante sira bele hetan oportunidade hodi kontinua aprende iha ajénsia nasionál no internasionál sira.

UNPAZ iha fakuldade rua mak avansa ba avaliasaun no akreditasaun mak Ekonomia ho nia departamentu Empreendedorizmu, Jestaun, Bankária no Akuntabilidade. Ba Fakuldade Tékniku ne’e maka reavalia kursu Arkitetura no Enjeñaria Sivíl.

Notísia relevante: ANAAA halo avaliasaun ba kursu Empreendedorizmu iha UNPAZ

Jornalista: Tomé Amado

Editora: Maria Auxiliadora