DILI, 10 agostu 2023 (TATOLI)—Diretór Ezekutivu empreza australiana Peoplein/RWN, Tom Reardon, akompaña hosi Sekretáriu Estadu Formasaun Profisionál no Empregu (SEFOPE), Rogério Araújo Mendonça no Embaixadora Timor-Leste ba Austrália, Inês Almeida, kinta ne’e, hasoru malu ho Primeiru-Ministru, Kay Rala Xanana Gusmão, hodi introdús polítika halo rekrutamentu traballadór timor-oan bá serbisu iha Austrália.
“Primeiru-Ministru kontente tebes tanba programa IX Governu nian maka hakarak redús taxa dezempregu iha Timor-Leste, tanba Diretór Ezekutivu Kompaña Peoplein/RWN, Tom Reardon hakarak emprega timor-oan bá serbisu iha Austrália,” Sekretáriu Estadu Rogério informa hafoin hasoru malu ho Xefe Governu, iha Palásiu Governu.
Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália
Pedidu ne’ebé jerente empreza hato’o ba Xefe Governu maka atu rekruta timor-oan 10.000 bá serbisu iha Austrália tuir etapa.
Xefe Governu agradese tebes tanba empreza ne’e hakarak ajuda Timor-Leste redús númeru dezempregu.
Kritériu ne’ebé parte SEFOPE no empreza Peoplein/RWN aprezenta ba Xefe Ezekutivu maka sei halo uluk formasaun ba timor-oan sira-nia mentalidade iha sentru formasaun ne’ebé loke iha kada munisípiu hodi tuir kursu lian inglés. Hafoin remata kursu, parte empreza ho parte SEFOPE sei halo entrevista direta ho kandidatu traballadór sira.
Área servisu ne’ebé oferese maka agrikultura, indústria, fábrika, ospitalidade no seluk tan.
Iha biban hanesan, Embaixadora Timor-Leste iha Austrália, Inês Almeida husu ba joven feto no mane atu prepara-an hodi tuir formasaun lian inglés, atu ne’e bainhira empreza presiza, bele hetan oportunidade atu serbisu ho dignu.
“Empreza Peoplein/RWN koñesidu iha Austrália no hakarak simu de’it traballadór timor-oan. Tanba ne’e husu ba kandidatu sira atu prepara, presiza tuir kursu inglés hodi fasilita traballadór sira bainhira bá serbisu bele halo komunikasaun di’ak,” diplomata tenik.
Jornalista : Antónia Gusmão
Editora : Julia Chatarina
