Governu entrega ona mate-isin traballadór na’in-rua ba família
DILI, 13 agostu 2023 (TATOLI)—Governu liuhosi Sekretária Estadu Formasaun Profisionál no Empregu (SEFOPE), domingu ne’e, entrega ona mate-isin traballadór na’in-rua ne’ebé mate iha Korea iha 30 jullu 2023 tanba hetan asidente ho motór.
Notísia Relevante: Traballadór na’in-rua mate iha Koreia Súl sees ona hosi sistema
Mate-isin Gracildo Soares da Silva no Florindo de Araújo Fátima, nia mate-isin to’o iha Aeroportu Internasionál Nicolau Lobato Comoro, Dili, iha tuku 07h30 dadeersaan ho aviaun Royal Drukair Airlines.
“Ita hotu sente triste no lakon boot ho sira-nia mate tanba sira ba servisu iha Korea Súl hanesan liña daruak libertasaun povu nian liuhosi liberta ekonómia família no nasaun ida-ne’e. Tanba, sira-nia objetivu ba servisu mak hakarak hadi’a ekonómia família no hasa’e kresimentu ba ita-nia nasaun ida ne’e nian,” Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten bainhira entrega mate-isin ba família sira iha Aeroporto, Comoro.
Reprezentante família matebian Florindo de Araújo Fátima hato’o agradesimentu ba Governu liuhosi SEFOPE ne’ebé halo ona esforsu makaas ohin loron mate-isin rua ne’e bele to’o Timór.
Nu’udár família matebian husu mós traballadór sira seluk ne’ebé daudaun sei servisu iha Korea Súl kuidadu labele konsumu alkólika nune’e bele livre hosi asidente hotu.
Reprezentante família matebian, Leandro Sena, mós hato’o agradesimentu ba Governu rua, Governu Timor-Leste no Korea Súl ne’ebé halo ona esforsu bele lori fila ona mate-isin rua ne’e mai Timór.
“Lori família nia naran hato’o agradese ba Governu Timor-Leste no Korea Súl nomós ba hotu-hotu nia apoiu, ohin, ita-nia mate-isin rua ne’e bele mai ho di’ak,” nia hateten.
Matebian Gracildo Soares da Silva, moris iha Dili, loron 29 agostu 1986, ba servisu iha Korea Súl hahú iha tinan 2010 hosi kompañia Kowonsusan área peska.
Enkuantu matebian Florindo de Araujo Fatima, moris iha Nunomoge, Hatubiliku, munisípiu Ainaro iha loron 10 fulan Janeiru tinan 1992, hetan oportunidade ba servisu iha Korea Súl iha tinan 2016 hosi kompañia GIM SEONGBAE área peska.
Jornalista : Arminda Fonseca
Editór : Cancio Ximenes
