DILI, 22 agostu 2023 (TATOLI) – Profesór 60-resin ne’ebé husu suspensaun ba atividade ensinu tanba sai apontamentu polítiku iha mandatu Ministériu Edukasaun, Juventude no Desportu anteriór seidauk fila bá hanorin, tanba hein hela mapeamentu husi ministériu atu koloka sira ba eskola sira.
Edukasaun seidauk iha mapeamentu ida atu koloka manorin sira ne’e, maibé buka hela forma ida atu halo ida ne’e hodi bele koloka tuir duni nesesidade eskola nian
Diretór-Jerál Administrasaun no Jestaun Finansa, Antoninho Pires, hatete profesór sira ne’ebé mak hanesan apontamentu polítiku hodi bá apoiu serbisu iha Ministériu Edukasaun, balun destaka iha edukasaun munisipál, balun asume kargu nu’udar xefe gabinete, diretór sira ne’e ho forma legál.
“Hanesan sidadaun no hanesan funsionáriu sira iha direitu tomak atu ezerse funsaun iha fatin ne’ebé de’it laiha ema ida maka bele limita sira-nia direitu”, Antoniho Pires afirma iha Vila Verde.
Manorin sira ne’e nia prezensa iha Ministériu Edukasaun, tuir Antoninho Pires, hetan legalidade tanba Komisaun Funsaun Publika iha koñesimentu sobre asuntu ne’e.
“Sira na’in-60-resin ne’ebé destaka mai iha Ministériu Edukasaun ne’e mós la’ós permanente, más periódikamente de’it. Sira mai tanba apontamentu polítiku, kuandu mandatu remata ona sira filafali ba hanorin”, esplika.
Tuir Antoninho Pires, dezafiu ne’ebé mak ministériu hasoru maka oinsá atu koloka sira ne’e maka tenke tuir duni méritu, signifika tenke koloka ema tuir duni nesesidade eskola nian no koloka tuir duni númeru profesór ne’ebé presiza iha kada eskola sira.
Nia dehan mapeamentu ne’ebé ministériu kria antes ne’e jerál de’it. Agora, ida foun ne’ebé maka Edukasaun hakarak kria ne’e própriu ba eskola de’it. “Signifika profesór na’in hira maka eskola ida presiza depois sira ne’ebé atu koloka bá eskola sira ne’e atu lori matéria ka disiplina saida de’it, nune’e maka ministériu bele identifika loloos eskola ne’e menus profesór ka la’e”, realsa.
Iha sorin seluk, inspetór eskolár munisípiu Dili, Aniceto da Costa, haktuir nia hetan nomeasaun hodi sai inspetór eskolár entre 2022 no 2024 bazeia ba lei no pur méritu nomós desizaun pur konfiansa. Knaar ida ne’e nia asume iha mandatu VIII Governu nian.
“Karik bá oin maka mosu desizaun polítika ida husi IX Governu atu nomeia fali ema seluk, sei fila fali bá eskola 12 Novembru hodi kontinua hanorin iha ne’eba. Maski mandatu VIII Governu remata ona, maibé knaar ne’ebé asume sei nafatin hetan konfiansa”, dehan.
Planu ministériu nian atu koloka fali profesór sira tuir méritu no tuir nesesidade kada eskola, Aniceto da Costa konsidera planu ida di’ak tebes, nune’e manorin sira ne’ebé hetan destakamentu iha eskola sira ne’e atu hanorin duni.
Jornalista: Tomé Amado
Editora: Maria Auxiliadora
