MTK sensibiliza utilizasaun transporte seguru iha Maliana
MALIANA, 24 agostu 2023 (TATOLI)-Ministériu Transporte no Komunikasaun sevisu hamutuk ho PNTL seksaun tránzitu rodoviariu nasionál, kinta ne’e realiza semináriu kona-bá dezenvolvimentu polítika implementasaun iha área transporte públiku ho seguru ba mudansa inkluziva ba estudante, ema ho defisiénsia, komunidade no autoridade lokál sira iha postu administrativu Maliana, munisípiu Bobonaro.
Segundu Vise-Prezidente Grupu Trabalhó Genernu Inkluzaun Sosiál no Embaixádór ba Ema ho Defisiénsia hosi Ministériu Transporte Komunikasaun, Marçal Pinto, esplika, semináriu ho tema ‘Asegura Transporte Públiku no Terminál Pasajeiru Seguru’ ne’e oinsá atu hakbiit entidade hotu nia koñesimentu ba utiliza transporte rodoviariu, zebra-cros no sinál tránzitu.
“Ne’e ita atu evita akontese engrafamentu, ezemplu hanean iha kapitál Dili, entaun oinsá mak Ema liu-liu Ema ho Defisiénsia sira bele asesu infraestrutura iha dalan públiku hodi prevene-aan hosi asidente tráfegu,” nia informa ba jornalista sira, iha salaun PDHJ Maliana.
Profesór Eskola Téknikuu Vokasionál número II Malibaka, Yamato, Maliana, Lázaro de Jesus Santos, konsidera atividade ne’e bele fó hanoin ona na ema hotu liu-liu utente transporte rodoviariu sira atu kumpri regra tránzitu nian.
“Ita Ema ho ema mak salva vida ba malu, agradese tebes ho sensiblizasaun ida-ne’e bele fó hanoin Mai ita atu asegura ita-nia vida, entaun hanesan oportunidade di’ak ita bele halo tuir, tanba ne’e salvasaun ba ita-nia vida,” Lázaro dehan.
Nia subliña, programa ne’e importante tebes no sai hanesan matéria ida atubele habelar ba estudante sira iha ensinu no aprendizajen.
“Ita rekomenda ba Ministériu Transporte Komunikasaun atu servisu hamutuk ho Ministeriu Edukasaun atu núne’e bele sai kurríkulu ida,” nia rekomenda.
Ema ne’ebé partisipa iha atividade ne’e na’in-50, komposta hosi Ema ho Defisiénsia 10, LGBTQI 10, feto potensiál 10, labarik feto-mane na’in 10 no kondutór na’in-10.
Notísia relevante:DNTT prepara mapeamentu sinál tránzitu ba estrada urbana Maliana
Jornalista: Sergio da Cruz
Editór: Evaristo Soares Martins
