DNTT prepara mapeamentu sinál tránzitu ba estrada urbana Maliana
MALIANA, 05 junu 2023 (TATOLI)-Diresaun Transporte Terrestre (DNTT), Munisípiu Bobonaro prepara ona dadus kona-bá sinál tránzitu ne’ebé atu instala iha estrada Urbana Maliana Vila pista ho modelu pista rua ka dua jalur ne’e.
Enkuantu Projetu Reabilitasaun Estrada Maliana Vila ho naruk distánsia kilómetru 4,91 no luan metru 23 ne’e lansa ona hosi Prezidente Parlamentu Nasionál, Deputadu Aniceto Longuinhos Guterres Lopes, iha sesta loron (01/05).
Notísia relevante: Governu hatuur fatuk dahuluk ba projetu estrada urbana Maliana
“Ita mos prepara dadus balun kona-bá snais (sinál) hira mak sei monta iha área urbana Maliana, ita iha mapeamentu hodi kompleta fasilidade hirak-ne’e, tanba estrada la’ós de’it estrada presiza mós kompleta ho fasilidade sinál tránzitu atu garante ho seguru iha movimentu iha estrada públiku,” Diretór Transporte Terrestre Munisípiu Bobonaro, João Paulo Henriques Baptista, informa ba Tatoli iha Maliana, segunda ne’e.
Nia dehan, tuir loloos molok implementa Ministériu Obra Públika (MOP) presiza halo koordenasaun servisu instituisaun relevante liuliu (DNTT) munisípiu Bobonaro nune’e bele fó ideia ba malu hodi kompleta fasilidade iha estrada ne’e.
Maibé nia dehan, DNTT sei akompaña projetu refere, tanba dalaruma estrada refere pakote ida kedas ho sinál tránzitu.
“Se kuandu sinál tránzitu la tama iha pakote ho estrada, entaun parte obra públika presiza halo koordenasaun atubele haree katak sira presiza númeru hira mak durante ne’e estabelese tiha ona, ami sei aprezenta hodi kompleta fasilidade hirak-ne’e,” João Paulo dehan.
Entretantu totál valór projetu ba obra ne’e hamutuk milaun $21-resin ($21,228,762.00) ho durasaun kontratu fulan 18 ne’ebé ezekuta hosi Empreza PT Hutama Karya (Parsero).
Notísia relevante: Reabilitasaun estrada urbana Maliana hein vistu hosi Tribunal
Jornalista: Sérgio da Cruz
Editór: Evaristo Soares Martins
