INSS halo pagamentu subsídiu BDMJF iha SSK Ritabou
MALIANA, 05 setembru 2023 (TATOLI)-Institutu Nasionál Seguransa Sosiál (INSS), tersa ne’e halo pagamentu subsídiu ba benefisiáriu Bolsa da Mãe Jerasaun Foun (BDMJF) iha Sentru Saúde Komunitária (SSK), Ritabou, postu administrativu Maliana, munisípiu Bobonaro.Benefisiária suku Ritabou, Angelina de Jesus, sente kontenti no agradese tanba nia oan bele simu ona subsídiu ne’e.
Notísia relevante: MSSI rejista ona aplikante “bolsa da mãe jerasaun foun” 43.137
“Osan ida ne’e bele ajuda ami-nia oan nia nutrisaun no bele ajuda ami iha buat ruma, osan ne’e ema hameno ami haruka atu fó haan labarik sira-ne’e duni, ami sei halo tuir,” nia informa ba Jornalista sira, iha SSK Maliana.
Xefe sentru saúde Maliana, Anacleto Godinho Pereirra, esplika prosesu pagamentu ne’e loron dahuluk hala’o iha suku Holsa, ohin kontinua iha suku Ritabou, sei ba tan suku seluk ne’ebé pertense ba postu administrativu Maliana.
Nia subliña, molok pagamentu ekipa saúde sira sei hala’o atividade tetu no sukat labarik nia todan no aas, vasina ba sira-ne’ebé seidauk kompletu.
“Liga ho programa ida-ne’e, ami-nia kobertura vasinasaun no konsulta ABC inan isin-rua nia aas tebes,”Anacleto konfirma.
Nia haklaken, hafoin asesu subsídiu maka labarik sira-nia pezu no aas laiha mudansa, ekipa saúde sei hala’o aitividade promosaun saúde no nutrisaun no programa Demo Cocking.
“Ita tein hahán ba inan-aman sira hare, depois fila ba uma bele prátika ho osan oituan ne’ebé mak sira hetan, bele mantein labarik nia saúde di’ak,” nia dehan.
Enkuantu tuir dadus totál benefisiáriu labarik tinan 0 to’o 6 no inan isin-rua hahú hosi fulan-juñu to’o agostu na’in 1,400.
Entrteantu prosesu pagamentu ne’e hetan observasaun hosi reprezenta Governu Austrália liuhosi Parseria Dezenvolvimentu Umanu (PHD, sigla inglés) ne’ebé apoia programa refere.
Notísia relevante: Inan isin-rua hakbesik fasilidade saúde asesu “bolsa da mãe jerasaun foun”
Jornalista: Sérgio da Cruz
Editór: Evaristo Soares Martins
