MS prioriza rekursu umanu kualifikadu atu fó asisténsia ba populasaun
DILI, 07 setembru 2023 (TATOLI) – Diretora Jerál Prestasaun Saúde iha Ministériu Saúde, Odete da Silva Viegas, dehan Ministériu Saúde nafatin tau prioridade ba rekursu umanu hodi fó asisténsia ne’ebé kualidade ba populasaun sira iha Timor -Leste.
“Asuntu rekursu umanu sai mós asuntu importante ne’ebé mak ami tau prioridade tanba ita ko’alia kona-ba asisténsia ne’ebé kualidade ba ita-nia populasaun mak ita tenke fó kapasitasaun ba ita-nia profisionál saúde sira atu halo atendimentu ne’ebé di’ak ba ita-nia populasaun sira iha ita-nia rain”, Odete da Silva Viegas, informa iha Palásiu Sinzas Caicoli, ohin.
Nia dehan, husi Governu anterior to’o ohin loron, MS halo servisu lubuk ona, entaun MS mós haree ba mapeamentu, hahú kedas 2021 atu haree distribuisaun profisionál saúde sira tantu médiku, enfermeiru, parteira, tékniku aliadu sira, espera katak Governu da-sia ida ne’e bele halo kontinuasaun no bele responde ba nesesidade komunidade nian iha baze.
“Agora daudaun ita haree ema ne’ebé mak eskola kona-ba saúde maibé seidauk iha servisu, entaun ida ne’e kabe ba Komisaun Funsaun Públika hodi loke vaga ba MS nia nesesidade, tanba ita haree katak funsionáriu permanente barak tama ba tinan reforma ona, entaun ezersísiu saida mak halo mak ami haree hela atu oinsá bele kontrata ka atu eleva kapasidade liuliu haree munisípiu balun mak profisionál saúde barak no balun la iha, entaun ida ne’e mak ita atu halo rekolokasaun ba munisípiu sira hafoin ita fó servisu ba sira”, Odete esplika.
Totál funsionáriu permanente iha Ministériu Saúde hamutuk 5490, husi númeru ne’e rejime espesiál hamutuk 4.200 no rejime jerál hamutuk 1.290.
Jornalista : Felicidade Ximenes
Editór : Zezito Silva
