PR-Embaixadora Boa Vontade UNFPA vizita HNGV

DILI, 07 setembru 2023 (TATOLI) – Prezidente Repúblika (PR) hamutuk ho Embaixadora  Boa Vontade UNFPA, halao vizita ba Hospitál Nasionál Guido Valadares (HNGV) hodi haree pasiente sira iha sala maternidade.

“Ohin ha’u mai kompaña Embaixadora Boa Vontade UNFPA tanba nu’udar Embaixadora Boa Vontade nia bele ko’alia sai ba doadór sira iha Europa no nasaun unida kona-ba realidade nia haree no hato’o ba doador sira, para apoiu liután, programa kona-ba inan sira no oan sira, liuliu mak oan sira tanba dala barak iha Governu rasik no iha rai barak iha mundu, haluhan atu tau matan ba kosok oan sira ho inan sira tanba ne’e nia mai vizita HNGV hodi haree inan isin rua no kosok oan sira ne’ebé baixa iha sala maternidade”, Xefe Estadu ne’e dehan bainhira remata vizita sala maternidade iha HNGV, ohin.

Nia hateten, Timor-Leste halo ona esforsu barak maibé seidauk sufisiente atu halo atendimentu di’ak ba inan no oan sira.

“Klaru iha Timor, ita halo esforsu barak, ita haree maibé la sufisiente, espasu la sufisiente no mós ladún iha inisiativa para selu didiak parteira, enfermeiru sira tanba ha’u ko’alia barak ona tau matan ba iha parteira, enfermeiru no doutór sira, tau matan ba motorista ambulánsia inklui tau matan ba sira ne’ebé mak dasa rai iha HNGV tanba dasa rai iha ospitál perigozu, la’os dasa rai hanesan iha ministériu sira seluk, tanba iha ospitál ne’e bateria barak no dezafiu boot ba sira”, Horta esplika.

Nia informa, Programa boot ba tinan lima mai, Governu sei bele halo buat balun no buat barak ba povu ida ne’e.

“Tinan lima ida ne’e, Governu hadia ospitál hodi aumenta númeru médiku espesialista sira, aumenta ekipamentu ospitál nian no aumenta doutór sira iha suku no aldeia, entaun ida ne’e mak prioridade tebes ba ita-nia povu”, nia sujere.

Embaixadora Boa Vontade UNFPA, Catarina Furtado, agardese ba oportunidade ida ne’e, tanba bele vizita ona Hopsitál Nasionál Guido Valadares ne’ebé akompaña husi Prezidente Repúblika Timor-Leste, Ministra Saúde no Reprezentante UNFPA iha Timo-Leste.

“Husi vizita ne’e, ami haree katak kazu mortalidade maternál no neonatal ne’e importante tebes tanba ne’e estadu presiza tau atensaun ba ida ne’e. Nune’e ospitál rasik tenke trata ho didiak ba kazu mortalidade maternál no neonatal ida ne’e liuliu inan isin rua sira iha Timor-Leste”, Catarina Furtado informa.

Vizita Embaixadora Boa Vontade UNFPA akompaña husi Prezidente Repúblika, Jose Ramos Horta, Minsitra Saúde, Elia dos Reis, Vise–Ministru ba Operasionalizasaun Ospitál, Flavio Brandão, Reprezenatnte UNFPA iha Timor-Leste, Pressia Arifin cabo no inklui Konsellu Diretivu HNGV.

Jornalista : Felicidade Ximenes

Editór : Zezito Silva