DILI, 13 setembru 2023 (TATOLI) – Prokuradór Jerál Repúblika (PGR), Alfonso Lopez, hateten, kazu eis-Ministru Interiór Longuinhos Monteiro ne’ebé rai armas proibida (kilat) iha nia rezidénsia, Ministériu Públiku seidauk arkiva no kazu ne’e sei iha hela prosesu nia-laran.
Lider Ministériu Públiku hato’o kestaun ne’e hodi hatan ba informasaun ne’ebé la’o iha públiku katak Ministériu Públiku arkiva kazu Eis-Ministru Interiór Longuinhos Monteiro ne’ebé rai kilat iha nia rezidénsia tanba kazu ne’e kle’ur ona.
Nia dehan, MP atu arkiva kazu ne’e tenke la’o tuir prosesu, tramitasaun legál liuliu tenke ho baze, la’ós la tuir baze legál naran arkiva ona kazu ida.
“Kazu hotuhotu, jeralmente la’o tuir tramitasaun legál, kazu hotu atu arkiva ne’e tenke ho baze”, Alfonso Lopez, hateten ba jornalista sira bainhira partisipa iha serimónia pose ba Governadór Banku Sentrál Timor-Leste (BCTL, sigla portugés) foun iha edifísiu BCTL Akait, kuarta ne’e.
Nia dehan, hanesan PGR seidauk simu informasaun katak kazu Longuinhos Monteiro arkiva ona.
“Prokuradór Titulár seidauk ko’alia buat ruma kona-ba ida ne’e. Ha’u seidauk iha informasaun”, nia informa.
Rekorda katak iha segunda (16/1) tuku ida dader, ekipa konjunta kompostu hosi Polísia Sientífika Investigasaun Kriminál (PCIC, sigla portugés), Servisu Informasaun FALINTIL-Forsa Defeza Timor-Leste no Servisu Nasionál Intelejénsia (SNI), halo kedan apreensaun buska no domisiliáriu ba rezidésia área Loes, Eis Komandante Jerál Polísia Nasionál Timor-Leste Longuinhos Monteiro iha Postu Administrativu Bazartete, Munisipiu Liquiça, tanba ekipa konjunta deteta eis-Komisáriu PNTL asegura hela sasan hanesan kilat bo’ot tolu, pistola ida, rama automátika ho monisaun ba kilat J, M16 no Pistola Glock19.
Haree ba hahalok ne’e iha (17/1), PCIC detein eis-Ministru Interiór Longuinhos Monteiro iha sela PCIC hodi kumpre oras 72 molok submete ba prosesu interogatóriu dahuluk iha Tribunál Judisiál Primeira Intánsia Díli.
Iha (18/1) eis-Ministru Interiór ne’e Tribunál la konsege hala’o Interogatóriu ba eis-governante ne’e tanba konsidera katak apreensaun buska no domisiliáriu ne’ebé autoridade seguransa halo la priénse organizmu lei.
Iha loron ne’ebé hanesan iha oras tuku 20:00, kalan ekipa konjunta kompostu hosi Polísia Sientífika Investigasaun Kriminál (PCIC, sigla portugés), Servisu Informasaun FALINTIL-Forsa Defeza Timor-Leste no Servisu Nasionál Intelejénsia (SNI), halo tán apreensaun buska no domisiliáriu ba rezidésia Longuinhos Monteiro iha área Fomentu, Suku Comoro, Postu Administrativu Dom Aleixo, Munisípiu Díli no ekipa konsege hetan tán armas balun hanesan pistola tolu kilat musan balun.
Jornalista: Natalino Costa
Editór: Zezito da Silva
