DILI, 15 setembru 2023 (TATOLI) – Normalmente, ofisina ba motór ne’e maioria envolve husi mekániku mane sira. Maibé, iha Taibessi, iha mekánika feto ida. Nia mak Emiliana Oliveira, na’in ba ofisina ‘Família Taibessi’.
Emiliana ne’ebé mak akaba nia estudu iha Eskola Sekundária 05 de Maio Becora, loke ofisina ki’ik ne’e ho osan $300. Ho verba ne’e, nia sosa uluk sasán ba nesesidade ofisina nian ne’ebé to’o ohin loron kontinua la’o hela ho jestaun ne’ebé nia rasik kria.
Husi negósiu ki’ik ida ne’e, kada loron nia hetan lukru boot liu mak dólar amerikanu 20 no ki’ik liu 14. “Ida ne’e mós depende ba tempu, tanba iha merkadu Taibessi ne’e kuaze ema loke ofisina barak loos”, nia konta.
Husi nia vontade loke ofisina durante tinan haat ne’e, nia foin maka emprega ema na’in rua atu ajuda nia hodi atende motór na’in sira ne’ebé hakarak mai troka óleu no taka roda. Maluk na’in-rua ne’e hetan insentivu depende ba lukru ne’ebé ofisina ne’e hetan iha loron ida.
“Ha’u seidauk hanoin atu bolu ema mai ajuda. Karik iha futuru maka ha’u-nian ofisina ne’e dezenvolve uituan, ha’u sei rekruta mós ema tanba ha’u-nian misaun ida maka atu fó serbisu ba maluk joven sira tantu feto no mane iha bairru laran”, nia promete.
Joven ho tinan 28 ne’e mós la’ós hakarak dezenvolve de’it nia empreza ki’ik ne’e, maibé mós nia koñesimentu no abilidade. Nune’e, nia mós partisipa formasaun iha Sentru Nasionál Formasaun Profisionál (SNFP)-Becora. Nia hili kursu mekániku atubele hetan esperiénsia no hadi’ak liután nia ofisina.
Ba nia, la’ós mane de’it mak bele tuir ida ne’e, maibé nu’udar feto nia mós hakarak hatudu nia kapasidade hanesan mane sira atu hetan esperiénsia. “Serbisu ne’e la’ós mane de’it mak bele halo, maibé feto mós iha kbiit atu halo ida ne’e”, nia salienta.
“Ha’u hili kursu mekániku ne’e tanba ha’u loke ona ofisina motór. Ha’u tuir tan formasaun atu hasa’e ha’u-nian koñesimentu hodi dezenvove ha’u-nian negósiu ida ne’e ba oin”, reitera.
Formasaun besik tinan ida iha SNFP-Becora, Emiliana aprende teoria no prátika oinsá mak sobu no monta ekipamentu ba motór, aprende instala ahi ba motór no seluk tan. Nia preparada ona atu hadi’a motór sira ne’ebé maka hakarak hatún nia mákina sira.
Ho matenek ne’ebé hetan ona, nia promete katak sei halibur fundu ruma atu dezenvolve tan nia ofisina, tanba nia iha ona koñesimentu natoon hafoin hala’o estájiu iha Ofisina Bemori no aprende husi nia sénior sira ne’ebé orienta nia tanba hakarak halo nia sai feto ida potensiál iha área mekánika ne’e.
Paulino Mendes, kliente ba ofisina ne’e dehan nia orgullu haree Emiliana nia vontade hodi hili dalan loke negósiu iha Taibessi. “Ida ne’e atu motiva ami mane sira katak feto de’it bele halo serbisu mane nian, tanba sá maka mane labele halo knaar ida ne’e”.
Nia dehan, ofisina ida ne’e maske nia na’in feto ida, maibé hatudu serbisu ho kualidade no sempre atende nia kliente sira, liuliu troka óleu, taka roda, hadi’a motor ne’ebé aat no fó rezultadu ne’ebé di’ak. “Ida ne’e hatudu katak formasaun ne’ebé nia hetan iha sentru ne’e iha duni benefísiu”, afirma.
Emiliana Oliveira mak formanda ida husi ema 113 ne’ebé foin simu sertifikadu hafoin finaliza tiha nia kursu iha SNFP-Becora.
Jornalista: Tomé Amado
Editora: Maria Auxiliadora
