DILI, 15 setembru 2023 (TATOLI) – Ministru Justisa (MJ) Amândo de Sá Benevides, dehan iha tinan ne’e, MJ sei atribui sertidadun nasionálidade ba sidadaun estrajeiru hamutuk 190.
Governante ne’e hateten, atribuisaun sertifikasaun nasionalidade ne’e bazea ba sidadaun estrajeiru ne’ebé maka dezde hela iha Timór liu ona tinan 20 inklui sira ne’ebé hola timoroan.
“Foin daudaun semana kotuk ita bo’ot sira haree ita atribui serfikadu nasionálidade ba ema estrajeiru 120 no ita sei atribui tán ba estrajeiru na’in 70, agora sei iha hela prosesu nia-laran molok atribui sertifikadu nain ba nasionalidade”, Amândo hateten ba jornalista sira iha Palásiu Governu, sesta ne’e.
Nia dehan, atribuisaun sertifikadu nasionalidade ba ema entrajeiru tenke kumpre rekezitu hosi Diresaun Jerál Servisu Rejistu Notariadu (DGSRN).
“Sira tenke priénse rekezitu liuliu sira tenke hela iha ne’e tinan 20 no ita sei kontatu ba sira-nia nasaun karik nia iha problema entaun haree hosi buat sira ne’e mak sira foin iha direitu ba atribuisaun sertifikadu nasionálidade”, nia afirma.
Tuir dekretu-lei númeru 1/2004 kona-ba nasionalidade iha artigu 12.º kona-ba naturalizasaun
- Ema-estranjeiru ne’ebé hakarak hetan nasionalidade timorense liuhosi naturalizasaun, tenke husu ba Ministru Justisa.
- Ema-interesadu tenke asina rekerimentu, ho rekoñesimentu prezensiál hosi ninia asinatura ne’ebé aprezenta ba servisu kompetente Diresaun Nasionál Rejistu no Notariadu no tenke tau naran kompletu, data moris, estadu sivíl, naturalidade, filiasaun, nasionalidade, hela-fatin atuál rekerente nian no hela-fatin anteriór, atividade ne’ebé ezerse no motivu sira hodi halo naturalizasaun.
- Rekerente sei instrui pedidu hamutuk ho dokumentu sira tuirmai:
- Ninia sertidaun asentu-moris, ne’ebé legalizadu hosi autoridade kompetente hosi fatin orijen sertidaun nian no tradús bainhira presiza;
- Títulu válidu ba autorizasaun rezidénsia nian, ne’ebé fó hosi autoridade nasional kompetente;
- Dokumentu komprovativu atu tama no permanénsia iha Timor-Leste;
- Dokumentu komprovativu kona-ba iha koñesimentu ba lian ofisiál sira ida Timor-Leste nian, outogradu hosi Ministériu Edukasaun, Kultura, Juventude no Desportu;
- Dokumentu komprovativu kona-ba integrasaun iha sosiedade timór, ne’ebé emiti hosi estrutura komunitária ezistente, liuliu, klube sosiál, sentru formasaun kulturál;
- Dokumentu komprovativu kona-ba kapasidade atu prova ninia subsisténsia;
- Dokumentu komprovativu kona-ba hatene Istória no kultura Timor-Leste nian, outorgadu hosi Ministériu Edukasaun, Kultura, Juventude no Desportu;
- Sertifikadu rejistu kriminál atualizadu hosi país orijen ne’ebé tenke legalizadu no tradús no sertifikadu atualizadu rejistu kriminál TimorLeste nian.
Jornalista: Natalino Costa
Editór : Zezito Silva
