DILI, 15 setembru 2023 (TATOLI) – Vise Diretór Programa Monitorizasaun Sistema Justisa (JSMP-sigla inglés) Casmiro dos Santos hakarak eme ne’ebé iha kapasidade, integridade no brani atu luta kontra korrupsaun, kandidatu ba Komisáriu CAC hirak ne’e mak Sergio Hornai no Rui Pereira dos Santos ne’ebé Primeiru-Ministru, Xanana Gusmão aprezenta iha reuniaun Konsellu Ministru.
JSMP lá duvida ho figura rua ne’ebé Governu liu hosi Primeiru-Ministru Kay Rala Xanana Gusmão aprezenta foin lais iha Konsellu Ministru atu lidera Komisaun Anti Korupsaun (CAC, sigla portugés).
“Ami importante mak ne’e, sé de’it mak ba lidera CAC ne’e tenke iha kapasidade, integridade no brani atu luta kontra korupsaun iha Timor-Leste”, Casmiro dehan ba jornalista-sira iha Palásiu Governu, sesta ne’e.
Tuir observasaun JSMP nian, CAC halo servisu barak durante mandatu Sergio Hornai nian.
“Durante iha nia mandatu buat lubuk ida mak sira halo, maibé iha mós dezafiu balun mak sira hasoru no la konsege halo servisu balun, se Governu propoin tan nia ha’u fiar nia sei ba halo servisu ho di’ak tanba iha esperiénsia kona-ba servisu CAC nian”, nia relata.
Kona-ba kandidatura rua ne’e, JSMP laiha preferénsia maibé husu ba Governu no Parlamentu Nasionál atu hili ema ne’ebé iha integridade no brani iha desizaun hotu ba kazu korrupsaun sira.
Iha sorin seluk, Diretór Ezekutivu Forum Organizasaun Naun Governamental Timor-Leste (FONGTIL) Valentin da Costa Pinto reforsa, figura rua ne’e la’os foun ba CAC ho nune’e hanesan Sosiedade Sivíl laiha dúvida.
“Na’in-rua ne’e la’os figura foun ba CAC, ne’ebé ami fiar katak Governu nia proposta ida ne’e sei lori ba Parlamentu Nasionál, bankada sira konkorda malu atu hili sé”, nia adianta.
Nia dehan, FONGTIL laiha autoridade atu ko’alia kona-ba kapasidade figura rua ne’e tanba Governu haree di’ak mak propoin.
“Ami rekomenda mak komisáriu foun bele forte servisu ho imparsiál, di’ak, barni hodi foti desizaun ba kazu sira ne’ebé sei enkamiña ba sira hodi lori ba investigasaun nune’e bele fó serteza ba públiku”, nia rekomenda.
Kandidatura rua ne’ebé Governu propoen iha Konsellu Ministru atu haruka ba Parlamentu Nasionál mak Sergio Hornai no Rui Pereira dos Santos.
Notíisia relevante : Governu propoin Sérgio Hornai no Rui dos Santos ba kargu Komisáriu CAC
Jornalista: Hortencio Sanchez
Editór : Zezito Silva
