Top

CAC rekoñese servisu investigasaun paradu

Edifísiu CAC. Imajen espesiál

DILI, 21 setembru 2023 (TATOLI) – Diretór Investigasaun Komisaun Anti-Korrupsaun (CAC, sigla portugés), José Veridiál, dehan durante fulan lima ona, la iha Komisáriu CAC, difikulta servisu CAC nian, liuliu liga ba prosesu investigasaun.

Nia dehan, desde Komisáriu CAC sesante Segio Hornai nia mandatu termina iha fulan abríl, hahú hosi ne’e CAC hetan difikuldade iha nia funsaun sira.

Desde abríl to’o meadu setembru, CAC rejista denunsia (keixa) hamutuk 53 ne’ebé aprezenta hosi públiku.

Hosi keixa sira ne’e, CAC halo de’it prosesu normál no haree katak hosi keixa hamutuk 53 ne’e iha balun mak tama ba kompeténsia CAC nian no iha balun ne’ebé tama ba instituisaun seluk nian kompeténsia.

”Sim, loos duni katak durante ne’e la iha Komisáriu dezde fulan abríl mai to’o ohin loron atu besik fulan lima ona, ami rekoñese katak ami labele halo servisu barak no importante balun ne’ebé CAC iha liuliu liga ba kestaun investigasaun”, José Veridiál hateten ba TATOLI via telephone, kinta ne’e.

Nia esplika, iha duni denúnsia ka keixa balun ne’ebé liga ba kazu ho asaun fraglánte delitu, maibé CAC labele halo nia servisu ida ne’e, tanba la iha Komisáriu atu delega kompeténsia atu halo ida ne’e.

Nia hatutan, iha tán kazu balun ne’ebé ezije CAC atu ba halo investigasaun no averiguasaun iha munisípiu sira, maibé tanba la iha Komisáriu atu halo aprovasaun orsamentu viajen lokál.

“ Ita tenke sakrifika servisu importante balun tanba ita labele ba bolu ema no labele ba foti ema nia deklarasaun iha asaun flagrante delito, ita labele halo ida ne’e. Ita tenke halo de’it prosesu normál. Durante fulan lima ita haruka kazu 10 ba Ministériu Públiku”, José Veridiál dehan.

Nia dehan, hosi kazu 10 ne’ebé CAC haruka ba Ministériu Públiku ne’e, maioria kazu sira ne’ebé tama ba iha kompeténsia CAC nian.

“Kazu sira ne’e ita seidauk haree nia kompexidade ba kazu saida, tanba hanesan ha’u dehan CAC seidauk tún ba halo investigasaun, tanba la iha Komisáriu atu delega prosesu sira ne’e”, nia adianta.

Iha lei Lei N.º 8/2009, de 15 de Jullu kona-ba kriasaun Komisaun Anti-Korrupsaun iha artigu 7, iha númeru 2 koalia kona-ba kompeténsia Komisáriu CAC no iha alinea A. deskreve katak Komisáriu CAC mak iha kompeténsia dirije atividade CAC nian.

Alinea B, hosi artigu ne’e nia mak dirije atividade dijensia ba kestaun prevensaun kriminalidade korrupasaun.

Alinea C, hateten Komisáriu mak iha kompeténsia atu distribui ba téniku sira ka investigadór atu halo investigasaun ba sira aktu sira ne’ebé hosi Ministériu Públiku atribui mai iha CAC.

Iha Alinea D, Komisáriu mak iha kompeténsia atu asegura no halo kordenasaun ho investigadór sira banhira investigadór sira halo hela prosesu investigasaun.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!