MALIANA, 22 setembru 2023 (TATOLI) – Implementasaun Programa Mão de Obra Postu Administrativu (PMOPA) faze ikus tinan 2023 ne’e, postu administrativu Cailaco, munisípiu Bobonaro, prioriza melloramentu estrada rurál no limpeza iha suku sira.
Administradór postu administrativu Cailaco, Alfredo Meta Dau, informa prioridade ne’e hodi kompleta faze dahuluk nian.
“Ita prioridade liu ba melloramentu estrada rurál sira, tanba iha faze primeiru sira ke’e maibé ita fó sira 20 dias balu la hotu, entaun faze ikus ne’e ita tán loron 50% ba sira halo hotu estrada ne’e,” nia ko’alia iha aldeia Daitete, suku Ritabou, sesta ne’e.
Alfredo Meta Dau, esplika estrada ne’ebé sei halo melloramentu mak iha suku Goulolo, Genulai, Atudara no Raiheu no Meligo ba Poerema.
Maibé molok implementa programa ne’e, sdministradór ne’e dehan, semana oin sei enkontru líder komunitária
Autoridade postu ne’e, akresenta, PMOPA faze ikus ne’e sei emprega trabalhadór na’in-550.
“Programa ne’e iha vantajen, tanba ita hare iha vila, suku sira-ne’e mós no kapás depois ita-nia komunidade sira servisu bele hetan osan hodi sustenta nesesidade uma laran,” Administradór Cailaco katak.
Ministériu Administrasaun Estatál (MAE) tinan ne’e aloka orsamentu rihun $600 hodi implementa Programa Mão de Obra Postu Administrativu (PMOPA), hosi montante ne’e kada postu administrativu neen iha munisípiu Bobonaro hetan rihun $10.
Notísia relevante: Komisaun E husu implementasaun PMOPA halo limpeza iha auto estrada
Jornálista: Sérgio da Cruz
Editór: Evaristo Soares Martins
