OÉ-CUSSE, 24 setembru 2023 (TATOLI) – Diresaun Rejionál Edukasaun Rejiaun Administrativa Espesiál Oé-Cusse Ambeno (RAEOA) liuhosi Sekretária Rejionál ba Asuntu Edukasaun no Solidariedade Sosiál, nomea profesora Domingas Elo, lidera Eskola Bázika Filiál (EBF) foun iha Ulas, suku Taiboko, sub-rejiaun Pante Makasar, no fulan novembru 2023 ne’e hahú simu estudante foun ba ensinu aprendizajen 2024 nian.
Notísia relevante: Edukasaun Oé-Cusse la autoriza profesór voluntáriu hetan legalidade iha ensinu aprendizajen
Sekretária Rejionál ba Asuntu Edukasaun no Solidariedade Sosiál, Avelina da Costa, informa, antes ne’e profesora Domingas Elo, hala’o nia kna’ar nu’udar manorin-na’in iha Eskola Bázika Filiál (EBF) Kiusiso.
Maibé hafoin autoridade harii eskola foun EBF ida iha suku Taiboko, seidauk iha manorin-na’in, nune’e parte edukasaun nomea urjenti hodi funsiona EBF Ulas iha tinan 2024.
“Profesora Domingas, nia sei halo nia kna’ar iha novembru depois ezame nasionál, ezame pasajen klase, nia halo hotu nia kna’ar pasajen de klase dezembru nia tenke mai rejistu alunu sira iha EBF Ulas-Lama ida-ne’e,” Avelina da Costa, ko’alia ne’e iha ámbitu inaugurasaun EBF Ulas iha suku Taiboko, sesta ne’e.
Nia informa, atu rejista estudante sira-ne’e, balu estudante foun no tuan, atu rejista uluk iha EBF Ulas ne’e, hahú hosi primeiru anu ba sira-ne’eb’e tinan to’o ona atu tama eskola bele mai rejistu matrikula iha EBF foun iha Ulas.
Nune’e mós sira-ne’ebé primeiru anu agora hala’o hela estudu iha EBF Kiusiso, atu pasa ba segundu anu, sei mai hotu iha EBF Ulas, no sira iha segundu anu iha EBF Kiusiso, agora atu pasa ba terseiru anu hanesan, iha 2024 sei mai hotu iha BF Ulas.
“Fatin ida-ne’e sei simu klase tolu, primeiru anu rejistu foun, segundu no terseiru anu sei simu hosi EBF Kiusiso, tan ne’e profesóra Domingas, bele prepara no ami sei haree hodi aumenta-tán profesór na’in rua bele mai ajuda iha ne’e, tanba prosesu aprendizajén sei la’o iha tinan oin 2024,” nia katak.
Notísia relevante: Edukasaun Oé-Cusse simu ona professór na’in-60 hosi KFP atu reforma
Xefes suku Taiboko, Joaquim Tafin, reprezenta komunidade aldeia Ulas iha bairru rua, agradese ba Autoridade RAEOA tanba bele fó solusaun ba preokupasaaun ne’ebé tinan barak komunidade aldeia Ulas enfrenta liuliu oan sira atu asesu ba eskola tenke hakat mota no dalan dook.
“Tanba sira desde tempu portugés mai to’o Indonézia, iha ne’e hanesan fatin tuan, maibé Taiboko koñesidu tanba Ulas tuan, ho prezensa eskola ida-ne’e maka bele fó solusaun ba ita-nia oan sira-ne’ebé la’o do’ok, hakat mota hodi buka sira-nia matenek liu-liu labarik sira ba eskola iha EBF Kiusiso, dalaruma iha tempu udan estudante balu la ba eskola tanba mota no dalan do’ok,” nia orgullu.
Notísia relevante: Autoridade RAEOA aloka millaun $1,5 hadi’a Eskola Bázika Filiál neen
Profesora Domingas Elo, konfirma, nia parte prontu atu simu desizaun ne’e nu’udar responsabilidade hodi hala’o kna’ar hanesan manorin iha Eskola Bázika Filiál Ulas.
“Agora daudaun ha’u bele simu responsabilidade ida-ne’e hahú iha tinan oin mai, tanba daudaun ne’e ha’u hanorin hela iha EBF Kiusiso, ne’ebé ha’u prepara no konkorda, maibé persiza mós aumenta tán profesór, tanba kuandu ema ida de’it maka mai hanorin la sufisiénte tanba iha sala tolu, maske estajiadu no voluntáriu, importante ajuda ha’u,” nia katak
Entretantu, Eskola Bázika Filiál Ulas ne’e, Autoridade harii ho kustu $58,760.11, ezekuta hosi kompania Huno Bahalaku Unipesoál Lda. Eskola ne’e harii bazea Planu Asaun Anuál 2022 nian, no iha setembru 2023 ne’e halo ona inugurasaun hosi Prezidente Autoridade RAEOA.
Notísia relevante: Autoridade RAEOA finaliza projetu EBF ida iha Ulaslama Taiboko
Jornalista: Abílio Elo Nini
Editor: Evaristo Soares Martins
