EBC Tunubibi menus sala aula no profesór
MALIANA, 26 setembru 2023 (TATOLI) – Ensinu Báziku Sentrál (EBC, sigla portugés) Tunubibi, suku Tapo-Memo, postu administrativu Maliana, munisípiu Bobonaro durante ne’e enfrenta problema menus sala aula no menus profesór.
Diretór EBC Tunubibi, Vasco Santos da Conceição, informa, problema ne’e akontese tanba númeru alunu ho totál na’in-511 ne’ebé akompañia hosi profesór na’in-20 de’it.
Ba kestaun ne’e parte eskola obrigatoriu koloka kada profesór responsável ba disiplina rua.
“Ami-nia problema mak ne’e menus profesór no sala aula, turma loraik nia mós menus profesór no sala aula, tanba terseira siklu ne’e turm arua-rua, 7 anu 8 to’o 9 anu mós turma rua-rua,” nia informa ba jornalista sira iha Mlaiana, tersa ne’e.
Diretór Vasco dehan, sala aula iha EBC ne’e hamutuk 12 fahe ba 1,2 siklu utiliza sala neen no 3 siklu sala neen ne’ebé kada aula akumula estudante na’in-36 to’o 38.
Nia hatutan, ho problema ne’e obrigatoriu estudante 1 siklu balu mós akumula iha sala ida de’it.
“Tuir regra loloos ne’e, primeiru-anu mós turma sala rua, maibé tanba sala laiha no profesór mós laiha, ita obrigatóriu tama iha sala ida de’it,” nia katak.
Problema kona-bá menus profesór no sala aula ne’e parte eskola hato’o beibeik ba Servisu Munisipál Edukasaun Bobonaro, maibé to’o agora seidauk iha resposta.
Alende EBC ne’e mós hasoru problema kona-bá laiha moru protesaun atu asesgura fasilidade eskola.
“Ami-nia varanda ne’e karik iha tempu udan, dadeer ita mai ne’e sente araska loos, ita atu la’o ba mai mós sente la di’ak, tanba mesak bibi-teen de’it,” diretór ne’e haktuir.
Kona-ba problema ne’e, dirijente eskola hato’o ona ba xefe aldeia Tunubibi no aviza ona katak komunidade ne’ebé mak husik animál movimenta livre iha arreadór eskola tenke simu konsekuénsia lakon animál.
“Bibi sira-ne’e tama ami baku mate duni, maibé nafatin bibi tama, tanba moru laiha, dalaruma joven sira mós tama hemu fali tua iha laran, to’o ha’u Bolu Polísia mai, ne’e tanba seguransa laiha,” nia haktuir.
Notísia relevante: ME planeia konstrui sala aula 1.200
Jornalista : Sérgio da Cruz
Editór : Evaristo Soares Martins
