Komisaun D buka-hatene preokupasaun ne’ebé Autoridade Baucau hasoru
BAUCAU, 27 setembru 2023 (TATOLI) – Parlamentu Nasionál liuhosi Komisaun D ne’ebé trata asuntu Ekonomia no Dezenvolvementu, kuarta ne’e, hala’o fiskalizasaun hodi buka hatene preokupasaun ne’ebé autoridade administrasaun munisipál Baucau enfrenta.
Vise Prezidente Komisaun D ne’ebé trata asuntu Ekonomia no Dezenvolvimentu, Deputadu Manuel Hendrique Noronha, esplika, objetivu hosi vizita refere iha asuntu tolu importante hanesan lala’ok serbisu autoridade administrasaun Baucau hala’o ona no sei hala’o inklui planu serbisu ne’ebé mak sei realiza iha futuru.
“Komisaun nia serbisu atu identifika problema ne’ebé diresaun iha munisípiu hasoru tanba direita kedas ba nesesidade povu nian,” nia katak.
Durante sorumutu ho autoridade Baucau, deputadu sira rona problema hanesan kanál irrigasaun no menus rekursu umanu nune’e komisaun D rejista hodi halo relatóriu no levanta iha plenária.
Ho vizita refere bele hatene direita kona-bá problema hotu ne’ebé munisípiu hasoru ligadu ho komisaun D nune’e relatóriu ne’ebé iha sei hato’o direita ba ministéiru relevante atu buka solusiona.
“Ita koalia kona-ba dezenvolvementu relasiona ho povu nia nesesidade ne’ebé povu hasoru,” Manuel Noronha argumenta.
Deputadu hosi Bankada Demokrátiku ne’e, argumenta, dezenvolvimentu setór infraestrutura iha Baucau jeralmente di’ak, mesmu iha problema balun ne’ebé presiza kolaborasaun entre governu lokál ho sentrál atu hamutuk rezolve.
Reprezentante povu ne’e, argumenta, kona-ba folin foos ne’ebé kontinua sa’e iha merkadu liuhosi aprovasaun orsamentu retifikativu aloka ona ba kada ministéiru nune’e governu mak iha kompeténsia atu regulariza folin sasán iha merkadu.
Parlamentu Nasionál husu ba governu atu buka solusaun ba problema refere mesmu impaktu folin foos sa’e iha merkadu mai hosi merkadu internasionál.
Alende ne’e, deputadu komisaun D rona mós kona-ba preparasaun fasilidade merkadu foun Tuanau ne’ebé tuir planu sei presiza kondisaun mínima hanesan bee-moos, saneamentu inklui fasildade ba ema ho defisiénsia antes muda vendedór ba merkadu refere.
Prezidente Autoridade Munisipál (PAM) Baucau, Olivio ‘Bou-Lesa’ Freitas, konsidera vizita deputadu komisaun D importante tanba bele rona no haree direita kondisaun serbisu iha administrasaun no progresu dezenvolvimentu iha Baucau.
“Ohin fó tempu ba serbisu diresaun sira atu hato’o preokupasaun ligadu ho obstákulu sira iha fatin serbisu nune’e deputadu sira bele relata iha plenária,” Bou-Lesa hateten.
Bou-Lesa, argumenta, problema ne’ebé hato’o importante atu reprezentante povu iha parlamentu hatene nune’e diskute ho governu liuliu ministériu relevante sira hodi buka solusaun ba situasaun ne’ebé povu hasoru iha baze.
Notísia relevante: Komisaun D sei hato’o problema tratór iha Baucau ba Governu
Jornalista : Natalino Belo
Editór : Evaristo Soares Martins
