KRAM sensibiliza rejime jurídiku prátika arte-marsiál no rituál bá estudante DMCL Maliana
MALIANA, 27 setembru 2023 (TATOLI) – Sub-Komisaun Reguladora Arte-Marsiál (KRAM), Munisípiu Bobonaro, kuarta ne’e sensibiliza Lei númeru 5/2017, 19 abríl kona-bá rejime jurídiku prátika arte-marsiál, rituál, arma branka no alterasaun dalima kódigu penál, ba estudante Ensinu Sekundária Jerál Númeru 1, Dom Martinho da Costa Lopes (DMCL) Maliana.
Preámbulu hosi rejime ne’e hateten, prátika arte marsiál ho objetivu atu promove atividade fíziku ho meiu atu transmite valór kulturál no étiku iha importánsia sosiál no kulturál ida ne’ebé labele husi ruma sosiedade, espesiál ba joven sira.
Artigu 7 (Ensinu, aprendizajen no prátika arte-marsiál), númeru 1 hateten, ensinu, aprendizajen no prátika arte-marsiál de’it autoriza ba ema-ne’ebé iha aptidaun psikofisiolójika ne’ebé apropriadu no oferese garantia morál no sívika iha respeitu ba orden sosiál estabelese.
Númeru 2 hosi rejime ne’e subliña, halo krime kontra seguransa estadu, kontra orden públika, kontra vida, kontra integridade fízika ka kontra liberdade pesoál ka seksuál bele hatudu nia falta di’ak ba efeitu sira-ne’ebé la’ós iha númeru anterior.
Númeru 3 hosi rejime jurídiku ne’e akresenta, responsabilidade ba avaliasaun aptidaun pratikante nian sei iha ba sentru, klubu no eskola ne’ebé destina ba prátika arte- marsial.
Númeru 4 hosi lei ne’e hateten, klibur sei mantein arkivu ho identifikasaun pratikante hotu ne’ebé akualiza di’ak.
Sensibilizasaun ne’e foka liu bá segundu diretiva Komisaun Reguladora Arte-Marsiál no lei arma branka.
Prezidente Sub-KRAM Munisípiu Bobonaro, José Ramos, esplika atividade ne’e realiza tanba iha eskola ne’e ho númeru estudante barak mak envolve grupu arte-marsiál.
Nia dehan, iha eskola ne’e mós sempre mosu konfrontu entre estudante sira mai hosi grupu arte-marsiál no rituál sira.
“Primeiru atu esplika kona-ba lei sira ne’e, tanba foin sa’e sira iha eskola ne’e mós hola parte iha arte-marsiál, dalaruma sira la komprende. Ne’e ita mai fahe informasaun kona-ba lei atu regula atividade arte-marsiál sira, nune’e estudante sira bele hatene,” nia ko’alia iha Maliana.
Komisáriu Sub-KRAM hosi Servisu Munisipál Edukasaun Bobonaro, Domingos da Costa, husu manorin-na’in sira atu servisu ho profisionál no tau interese komún aas liu interese grupu nian.
“Iha sekundáriu ida-ne’e ha’u hatene, hosi mestri tún to’o estudante tama arte-marsiál hotu, hanesan aman labele kaer buat ida-ne’e, tama laiha problema, oras livre bele ba halo atividade, maibé iha eskola labele uza buat ida-ne’e,” nia apela.
Diretór ESG Dom Martinho da Costa Lopes Maliana, Abel Sarimau, konsidera atividade ne’e importante tebes atu estudante sira bele komprende lala’ok tomak hosi lei ne’e.
Dirijente eskola ne’e husu ba estudante haklaken ba família no komunidade sira hotu.
“Atu ita labele komete, rona tiha mak kompete ne’e oin seluk, maibé bainhira rona tiha mak komete ne’e mós buat seluk ida, ne’e duni rona didi’ak tanba diseminasaun ne’e oportunidade di’ak ba imi atu la’o tuir buat loos,” Diretór Abel apela.
Enkuantu diseminasaun lei ne’e nu’udar atividade regulár KRAM nian ne’ebé sei hala’o kobre postu administrativu sira no eskola sira-ne’ebé rejista númeru konflitu aas.
Notísia relevante: KRAM ezije estrutura IKS Bobonaro aprezenta fatin no oráriu formasaun
Jornalista : Sérgio da Cruz
Editór : Evaristo Soares Martins
