BOBONARO, DESPORTU, MUNISÍPIU

KRAM ezije estrutura IKS Bobonaro aprezenta fatin no oráriu formasaun

KRAM ezije estrutura IKS Bobonaro aprezenta fatin no oráriu formasaun

Prezidente Sub-Komisaun Reguladora Arté Marsiál (KRAM) munisípiu Bobonaro, José Ramos. Imajen Tatoli/Sérgio da Cruz.

BOBONARO, 04 agostu 2022 (TATOLI) – Prezidente sub-Komisaun Reguladora Arte Marisiál (KRAM), munisípiu Bobonaro, José Ramos, ezije estrutura Ikatan Kera Sakti (IKS) munisípiu Bobonaro, atu aprezenta fatin no oráriu formasaun.

Nia fó-sai katak iha fulan-agostu tinan 2022 nia laran mak IKS la aprezenta fatin no oráriu formasaun, KRAM sei hapara atividade formasaun ba membru sira iha munisípiu ne’e.

Nia haktuir, hafoin governu liuhosi Sekretaria Estadu Juventude no Desportu (SEJD) reativa atvidade arte-marsiál, KRAM hahú kedas halo fiskalizasaun ba organízasaun arte-marsiál Persaudaraan Setia Hati Terrate (PSHT) no Kamek Oan Rai-Klaran (KORK) tanba submete lista no oráriu hosi kumpre diretiva ne’ebé fó-sai ona.

Nune’e to’o ohin loron KRAM konsege halo ona fiskalizasaun iha postu administrativu Maliana hamutuk fatin hitu hosi PSHT, no postu administrativu Bobonaro nian iha Suku Ai-Asa no suku Balibo Vila.

Enkuantu KORK nian mak iha suku Sanirin, postu administrativu Balibo no aban sesta, loron 05 sei kontinua hala’o iha suku Cowa, Leolima no suku Batugade.

Notísia relevante:KRAM sensibiliza segunda diretiva ba GAM iha Bobonaro

“Agora kuaze IKS nian mak to’o agora seidauk aprezenta sira-nia oráriu no fatin formasaun (ezersísiu) atu ami halo fiskalizasaun, agora tuir diretiva KRAM katak fatin ne’ebé la hatene no la halo fiskalizasaun, fulan agostu ami remata ona fiskalizasaun. Sé fatin laiha rejistu hosi KRAM, sira laiha direitu atu halo formasaun,” nia informa ba Jornalista sira, iha Maliana, kuarta ne’e.

José Ramos hatutan, durante ne’e KRAM esforsu halo kontaktu no halo enkontru kada semana ho lideransa GAM iha munisípiu Bobonaro, atu aprezenta lalais lista no oráriu formasaun maibé to’o agora IKS seidauk submete.

Maibé nia dehan hakarak ka lakohi iha fulan-agostu ne’e KRAM tenke konklui ona prosesu fiskalizasaun tanba atu aprezenta ona ba governu nune’e iha fulan-setembru bele deside ona katak fatin ne’ebé mak merese utiliza hodi halo formasaun no fatin ne’ebé mak labele halo atividade.

Ho nune’e Ramos dehan, di’akliu lideransa IKS munisípiu Bobonaro tenke halo esforsu másimu, tanba governu nia objetivu reativa arte-marsiál atu integra ba sosiedade hodi sai atividade desportu nasionál ida, maibe presiza kumpre diretiva ne’ebé KRAM estabelese ona.

“Sira halo atividade formasaun, ami sei koordena ho autoridade seguransa, sira la toma ami sei hato’o karta kaptura, tanba ne’e lei, ami iha kraik ne’e ezekuta de’it, ami estrutura KRAM mós bele foti desizaun, karik sira vióla matadalan ruma,” Nia fó hanoin líder organzisaun IKS Bobonaro.

2020 Governu liuhosi reuniaun Konsellu Ministru aprova proposta rezolusaun Governu ne’ebé aprezenta hosi Primeiru-Ministru, Taur Matan Ruak, ba revogasaun rezolusaun Governu númeru 16/2013, 10 jullu, ne’ebé bandu GAM halo atividade.

Ho nune’e, iha loron 30 fulan-abríl 2022, grupu arte marsiál no arte-rituál hala’o asaun dame iha nivél munisípiu sira, hahú ona kria amizade entre grupu arte-marsiál no arte-rituál iha munisípiu.

Rezolusaun Governu númeru 4/2020, 2 marsu, ne’ebé revoga tiha rezolusaun númeru 16/2013 hodi fó informasaun ba GAM tolu hanesan,  PSHT,  IKS no KORK bele kumpre regra sira-ne’e.

Notísia relevante:KRAM kontinua fó advokasia ba GAM iha Bobonaro

Arte-marsiál tolu tenke kumpri kritéria 18

  1. Estatutu federasaun/organizasaun ho lian Tetun no Portugés ne’ebé aprova iha asembleia jerál.
  2. Akta kongresu federasaun ka organizasaun
  3. Estatutu Federasaun/Organizasaun, kartaun identidade (BI, Kartaun Eleitorál no dokumentu relevante).
  4. Patrimóniu organizasaun.
  5. Atributu no materiál ne’ebé utiliza hodi prátika arte-marsiál uza durante iha fatin treinu.
  6. Mapa lokalizasaun treinu no fatin eskritóriu.
  7. Fundadór mínimu ema na’in-10 kompleta ho kartaun (BI, Kartaun Eleitorál no dokumentu relevante).
  8. Bom komportamentu treinadór ba sentru, klubu no eskola ne’ebé destinu ba prátika arte marsiál.
  9. Atestadu médiku treinadór nian.
  10. Karta autorizasaun hosi xefe suku no na’in ba rai (ba fatin treinamentu no fatin eskritóriu).
  11. Nível sertifikadu.
  12. Foto treinadór
  13. Totál membru tenke na’in-50 kada sentru, klubu ka eskola.
  14. Baze de dadus hosi membru hotu no nia responsável iha munisípiu 12 no REAO.
  15. Karta afiliasaun husi federasaun/organizasaun internasionál (ba organizasaun ne’ebé mai hosi estranjeiru).
  16. Deklarasaun hosi sentru, klubu ka eskola atu la afilia ba partidu polítika
  17. Deklarasaun laiha konflitu interna no eksterna organizasaun, no
  18. Karta rekomendasaun hosi FESTIL (ba organizasaun ne’ebé hamahon aan iha FESTIL).

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!