Mákina Litotripsia tiru ona fatuk iha pasiente rins hamutuk 28
DILI, 27 setembru 2023 (TATOLI) – Koordenadór Intervensaun Non Invasiva Minimally Invasive iha Hospitál Nasionál Guido Valadares (HNGV), Raimundo do Santos, hateten durante tinan ida ne’e, mákina litotripsia tiru sai ona fatuk iha pasiente nia rins hamutuk 28.
“Lista pasiente ne’ebé mak iha katak ita tiru ona fatuk iha ema nia rins hamutuk 28, husi númeru ne’e ita sura husi momentu ita lansa iha fulan setembru tinan 2022 to’o 27 setembru”, Raimundo do Santos informa ba jornalista sira iha HNGV, ohin.
Nia dehan, mákina litotripsia ne’e tiru husi liur de’it, la halo kanek, pasiente nia isin depois ida ne’e hotu pasiente fila oan ba uma.
“Bianhira ita haree katak fatuk nia ukuran iha mamik ne’e, oinsá boot ka kiik, se boot ita tenke opera iha kabun kidun, depois tama ba loke mamik hasai fatuk, depois suku fali mamik no suku tan kulit”, nia esplika.
Iha fatin hanesan, Espesialista Urulojia iha HNGV, Apolinario de Jesus Pinto, hatutan bainhira iha fatuk ne’e, iha tipu lima iha isin mak hanesan kalsium oxalate, kalsium phosphate, Cystine, Adam Urate, struvite.
“Struvite ne’e signifika katak pasiente ho infesaun iha sistema urinaria mak ita halo tratamentu tiha depois mosu fali, ida-ne’e mós halo fatuk mosu iha sistema urinaria. Maibé fatuk mosu ne’e defende mós fatór, depois pasiente balun akompaña mós ho moras sira seluk, hanesan hipertensaun, diabetes, entaun sira ne’e mós bele kontribui mós ba formasaun fatuk”, Apolinario esplika.
Nia konta, tratamentu ba moras rins iha urinaria ne’e, iha nasaun avansadu sira iha tratamentu, presiza hatene fatuk nia lokalizasaun, fatuk nia medida ne’e hira ho tan fatór husi pasiente rasik, tratamentu ne’ebé mak agora iha HNGV uza laser tiru rahun fatuk, karik fatuk ne’ebé mak boot liu mak uza halo operasaun de’it.
Jornalista : Felicidade Ximenes
Editór : Zezito Silva
