MS fó tratamentu espesializada ba veteranu 7.480
DILI, 27 setembru 2023 (TATOLI) – Ministériu Saúde fó tratamentu espesializada iha janeiru-agostu ba veteranu hamutuk 7.480, iha munisípiu lima.
‘’Husi janeiru to’o agostu, ita hamutuk ho Ministériu Asuntu Kombatentes Libertasaun Nasionál fó tratamentu espesializada ba veteranu hamutuk 7.480, iha munisípiu lima hanesan Manatutu, Viqueque, Lautem, Manufahi no Ermera”, Xefe Departamentu Apoiu no Koordenasaun Servisu Espesializadu iha Ministériu Saúde, Nilton da Cruz, hateten ba TATOLI iha nia kna’ar fatin Caicoli, ohin.
Nia dehan, husi veteranu sira ne’e, mane hamutuk 4.524 no feto 2.956 mak hetan tratamentu espesializada ida ne’e.
”Husi munisípiu lima ida-ne’e maioria moras ne’ebé ami deteta mak moras fuan, hipertensaun, diabetes, problema matan haree dook ka besik la moos, katarata, moras ruin no moras kulit”, nia informa.
Nia subliña, moras hirak ne’e, bainhira ekipa deteta halo transferénsia direta ba HNGV hodi simu trantamentu kontinuasaun. Atendimentu saúde sekundária husi médiku espesialista kardiolojia, Oftamolojia, Otorinolaringolojia, audiometria, medisina interna, ortopedia, fizioterapia, dermatolojia, jinekobstretisia, urulojia, sirurjia jerál, pediatria husi HNGV inklui ekipa medika xineza ne’ebé apoia ho ekipamentu EKG,USG portable no raiu-x.
Tuir planu, Ministériu Saúde ho Ministériu Asuntu Kombatente Libertasaun Nasionál sei halo tan konsulta espesializada ba iha Munisípiu Ainaro, Bobonaro, Covalima no RAEOA.
Jornalista : Felicidade Ximenes
Editór : Zezito Silva
