DILI, 29 setembru 2023 (TATOLI)-–Primeiru-Ministru (PM), Kay Rala Xanana Gusmão, sesta ne’e, simu vizita hosi Embaixadora Repúblika Federál Alemaña iha Indonézia, Asosiasaun Nasaun Sudeste Aziátiku (ASEAN, sigla inglés) no Timor-Leste, Ina Lepel.
Iha biban ne’e, Embaixadora hateten, foin ba dahuluk hasoru malu ho Xefe Governu, nune’e iha interese tebes hodi rona planu no programa IX Governu tanba Alemaña iha interese apoia Timor-Leste.
“Buat ne’ebé interesante ba ha’u atu apreende mak kona-ba prioridade no planu Governu foun, ami hakarak apoia planu sira, finansa sólidu no prosesu dezenvolvimentu ba povu Timor,” Diplomata ne’e relata hafoin hasoru PM Xanana, iha Palásiu Governu.
Notísia relevante : Posibilidade timor-oan bele serbisu iha Alemaña
Nia dehan, Alemaña sei halo esforsu hotu hodi fó apoia Timor-Leste no iha esperansa bele tulun.
“Ami bele fó kapasitasaun ba ekipa sira iha Timor-Leste, liu-liu ba prosesu adezaun hanesan membru plenu direitu ba ASEAN,” nia akresenta.
Embaixadora salienta, Alemaña iha projetu hanesan Training of Training (ToT), nune’e planeia atu estabelese iha Timor-Leste ba kapasitasaun timor-oan sira ne’ebé sei serbisu iha prosesu adezaun ba ASEAN.
Jornalista : Antónia Gusmão
Editora : Julia Chatarina
