Loron mundiál kardiaku, husu ema hotu tenke han ho kuidadu
DILI, 29 setembru 2023 (TATOLI) – Loron mundiál kardiaku, pasiente Pedro Canisio Mendonça ne’ebé daudaun ne’e halo tratamentu saúde iha Hospitál Nasionál Guido Valadares (HNGV) husu ema hotu tenke han hahan ho kuidadu.
“Ho Selebrasaun loron mundiál moras fuan mak ha’u husu ba ita hotu ne’ebé balun moras ona no balun seidauk moras ita tenke konsumu hahan ho kuidadu la bele han arbiru se lae afeta ba moras fuan ida ne’e”, Pedro Canisio Mendonça dehan ba TATOLI bainhira baixa iha sala ICU fuan iha HNGV, ohin.
Nia esplika katak ai-han ne’ebé médiku sira bandu labele han tenke halo tuir se hakarak han mak loron ikus afeta moras fuan ida ne’e.
“Hanesan doutór bandu labele han arbiru maibé ikus ha’u han nafatin mak hetan moras ida-ne’e hanesan han mina barak la halo ezersísiu no han masin barak”, nia hateten.
Pasiente moras fuan pedro Canisio Mendonça ho idade 67 sente kontente ho tratamentu di’ak ne’ebé mak médiku sira iha HNGV fó.
“Ha’u moras fuan ne’ebé hetan transferénsia husi Maubessi mak mai, maibé iha ne’e médiku espesialista sira HNGV ne’ebé haree ba moras fuan ne’e fó tratamentu mai ami mesak di’ak de’it”, nia informa.
Ho moras fuan ne’e, pasiente Pedro Canisio sofre durante tinan tolu ona, nune’e derepente atakasaun husi Hospitál Referál Maubesi halo kedas tranferénsia mai iha HNGV.
“Ha’u hetan atakasaun fuan nune’e ha’u mai tratamentu iha Maubessi maibé ho ekipamentu médiku ne’ebé la iha médiku sira iha Maubessi halo transferénsia ha’u mai HNGV hodi halo tratamentu kontinuasaun husi médiku espesialista sira”, nia haktuir.
Nia esplika, ekipamentu ne’ebé mak durante uza hodi halo tratamentu ba pasiente moras fuan ne’e sufisienete tanba bainhira halo transferénsia husi Maubessi mai espesialista sira atende kedas.
“Médiku sira-ne’e mesak timoroan de’it ne’ebé mai iha sala ICU fuan ne’e atende ami tuir oras nune’e ha’u kontente tanba sira-nia atendimentu di’ak los”, nia konklui.
Jornalista : Felicidade Ximenes
Editór : Zezito Silva
