DILI, 30 setembru 2023 (TATOLI)— Unidade Patrullamentu Fronteira (UPF), sábadu ne’e, komemora serimónia aniversáriu ezisténsia ba dala-20.
Ministru Interiór, Francisco Guterres, hato’o inisiativa hakarak hadi’a no moderniza kondisaun UPF atu nune’e bele halo kontrolu ho di’ak ba atividade pasajen ilegál inklui atividade negósiu ilísitu sira iha liña fronteira.
“IX Governu Konstitusionál iha hanoin hakarak hadi’a UPF, ita hakarak moderniza UPF,” Ministru hateten durante halo intervensaun iha serimónia iha Kuartél UPF Batugade.
Governante ne’e konsidera, presiza tau prioridade ba UPF tanba unidade ne’e hanesan pesoál seguransa ne’ebé garante seguransa interna no externa hodi fó apoiu ba FALINTIL-Forsa Defeza Timor-Leste (F-FDTL) no garante seguransa iha área terrestre hodi prevene ema labele tama no sai liu dalan ilegál inklui prevene atividade ekonómiku iha liña fronteira.
“Ita iha Polísia atu fó prioridade ba dezenvolvimentu UPF, nune’e bele hadi’a kondisaun hodi membru sira kontinua garante situasaun seguransa iha liña fronteira,” nia akresenta.
Francisco Guterres dehan, razaun IX Governu Konstitusionál fó importánsia hakarak hadi’a no moderniza UPF, tanba durante mandatu tinan-lima Timor-Leste sei hasoru eventu boot rua, hanesan adezaun ba membru plenu direitu ASEAN no dezenvolvimentu kampu petrolíferu Greater Sunrise.
“Timor-Leste sei tama ba ASEAN iha tinan 2025, ida-ne’e dezafiu bo’ot, liu-liu ba UPF, tanba nasaun barak iha ASEAN sei libremente halo movimentu iha Timor. Tanba ne’e, UPF ka Polísia tenke prontu hasoru buat sira ne’e. Dezafiu seluk mak dezenvolvimentu Greater Sunrise, ho nune’e mak Governu tenke tau prioridade ba UPF, liu-liu kria kodisaun ba sira atu ita-ita bo’ot sira bele dezepeña di’ak funsaun iha fronteira hodi fó seguransa ba nasaun no povu, hodi halo prevensaun ba atividade ekonomia ilegál no pasajen ema ho ilegál,” nia adianta.
Notísia relevante : Komandu PNTL sei destaka tán membru 39 apoia UPF iha fronteira
Governu sei tau kondisaun di’ak ba UPF, liu-liu infraestrutura adekuandu, aumenta rekursu umanu no formasaun ba rekursu umanu.
”Governu sei la taka matan ba ita-bo’ot sira atu imi kontinua desempeña imi-nian funsaun ho di’ak hodi fó benefísiu ba povu ida-ne’e. Ha’u apresia ho serbisu UPF durante ne’e, maski ho kondisaun limitadu, maibé nafatin presta serbisu di’ak tebes durante ne’e,” Ministru louva.
Biban ne’e, Ministru felisita UPF ne’ebé kompleta ona tinan 20 ezisténsia, tanba ne’e nia husu ba membru atu kontinua hatudu serbisu di’ak ba povu no nasaun Timor-Leste.
”Ha’u husu ba ita-bo’ot sira atu kumpre disipina, orden komandu no respeita irarkia Komandu sira hodi hatudu serbisu ba ita-nia povu,” nia hameno.
Iha fatin hanesan, Komandante Jerál PNTL, Komisáriu Jerál Polísia, Henrique da Costa, hateten, membru UPF daudaun ne’e iha 330, tanba ne’e Komandu PNTL iha ona hanoin atu destaka tan membru na’in-34 mai UPF hodi tau-matan ba seguransa iha liña fronteira.
“Maski durante ne’e UPF iha kondisaun limitadu, maibé iha tinan 2023 UPF halo serbisu no konsege identifika ema ne’ebé tama ilegál mai territóriu nasionál liuhosi liña fronteira hamutuk 6.000,” nia relata.
Aleinde ne’e, UPF halo apreensaun ba sasán kontra bandu hanesan tabaku, gazoel, gazolina, sasán alimentár, animál no motorizada.
“Tinan ida-ne’e, iha fulan-neen dahuluk, UPF halo apreensaun gazoel litru 20.000, gazolina litru litru 1.500, mina-rai litru 6.000 no motorizada hamutuk 18 inklui ho osan $3.000,” nia informa.
Komandante Henrique louva tebes serbisu UPF tanba maski ho limisaun membru, maibé kontinua halo serbisu prevensaun ba atividade ilegál iha fronteira terrestre Timor-Leste no Indonézia. Komandante Polísia husu ba membru sira atu kontinua hatudu serbisu di’ak no profisionál.
Nune’e mós, Komandante UPF, Superintente Asistente, Carlos Moniz Maia, hateten, UPF eziste ho lei orgánika PNTL númeru 55/2008 iha artigu 78 , atu gantia seguransa nasionál no fó seguransa ba fronteira.
Ho ezisténsia ba dala-20, nia nota UPF hanesan unidade ne’ebé mak atinje ona idade joven, tanba ne’e Governu presiza tau-matan hodi responde ba ninia ezisténsia.
“Tanba hanesan ema kuandu atinje ona idade 20 ne’e hanesan joven, konserteza nia nesesidade mós barak no presiza tau-matan. Ha’u agradese bainhira Ministru Interiór deklara katak sei fó prioridade ba kondisaun UPF, ida-ne’e ha’u rona ha’u kontente loos,” Komandante UPF tenik.
Jornalista : Natalino Costa
Editora : Julia Chatarina
