DILI, 24 setembru 2023 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, dehan Ministru Interiór orienta ona Komandu PNTL sei destaka tán membru PNTL 39 hodi apoiu Unidade Partrollamentu Froenteira (UPF), ho objetivu haforsa seguransa iha liña fronteira.
Komandu Jerál iha 1 outubru 2023 sei halo serimónia parada ida, hodi desloka ba membru 39 ba destaka iha fronteira, nune’e bele fó apoiu ba UPF atu bele fó seguransa iha liña fronteirisa.
“Tuir orientasaun Ministru Interiór nian katak presiza destaka tán membru balun iha fronteira, atu apoia servisu UPF iha fronteira tanba komandu sei ezekuta orientasaun ida-ne’e, ita sei koloka tán membru 39 atu bele reforsa servisu Unidade Patrollamentu Fronteira ba prevensaun atividade ilísitu sira”, Komisáriu Jerál Polísia Henrique da Costa, dehan iha nia aprezentasaun planu estratéjiku seguransa no Ministériu Interiór inklui Sekretaria Estadu Protesaun Sivil iha salaun CNE, segunda ne’e.
Nia dehan, membru sira-ne’e, Komandu PNTL sei hili hosi Komandu PNTL Munisípiu balun inklui membru balun hosi Unidade Espesiál Polísia (UEP).
“Presiza duni apoia tán ita-nia membru balun atu reforsa servisu UPF nian liga ba seguransa oinsá prevene atividade ilísitu sira”, nia konklui.
Notísia relevante : Presiza aumenta postu vijilánsia no membru UPF kontrola fronteira
Jornalista: Natalino Costa
Editór : Zezito Silva
