BCTL kapasita empreza kiik-médiu iha Bobonaro
MALIANA, 02 outubru 2023 (TATOLI) – Banku Sentrál Timor-Leste (BCTL, sigla portugés) parseria ho Institutu Apoia Dezenvolvimentu Emprezariál (IADE) no Kámara Komérsiu Industria Timor-Leste (CCI-TL, sigla portugés), realiza formasaun kona-ba área dokumentasaun finanseira no kontablidade bázika hodi kapasita empreza mikru kiik no médiu iha munisípiu Bobonaro kona-ba jestaun finanseira.
Xefe Divizaun Dezenvolvimentu Sistema Finanseira BCTL, Timotio Pires, esplika, programa ne’e estabelese iha tinan 2018 ne’ebé nu’udar knaar BCTL nian atu fornese informasaun ba sosiedade hotu-hotu oinsá atu halo jestaun finanseira iha uma-laran, liu-liu atu asesu kréditu iha instituisaun finanseiru sira hanesan Banku Nasionál Komérsiu Timor-Leste (BNCTL, sigla portugés), Kaebauk no Moris-Rasik.
“Sira atu ba foti kréditu iha-ne’ebá, entaun sira iha ona informasaun, sira hatene katak buat ida foti osan ne’e la’ós gratuita, ne’e mai hosi risku,” nia informa ba Tatoli, iha edifísiu Sentru Dezenvolvimentu Emprezariál, Munisípiu Bobonaro
Timotiu subliña, empreza kiik no médiu sira presiza hetan informasaun atu nune’e hamoris setór privadu sira.
“Iha nasaun avansadu barak, setór privadu ne’e mak hamoris fali estadu, tanba setór privadu selu taxa ba estadu, entaun sira atu selu taxa sira tenke moris tiha lai, entaun ita kapasita sira, depois sira moris tiha lai mak pelumenus kontinuasaun ba oin ho di’ak,” nia hateten.
Xefe Sentru Dezenvolvimentu Emprezariál, Munisípiu Bobonaro, Elias Cardoso,reforsa, IADE oferese formasaun ne’e atu empreza minór kiik no médiu sira iha koñesimentu kona-ba literasia jestaun finanseira ne’ebé di’ak liután, no garante asesu kréditu iha instituisaun finanseira sira.
“Atu asesu ba iha kréditu, banku presiza iha ligasaun ho IADE tanba IADE iha ninia matadalan, formatu, proposta ninia kompletu, la signifika ita-boot sira la hatene, maibé ita-boot sira mai tuir formasaun ne’e atu kompleta halo di’ak liután, keta buat balu, ita-boot sira la implementa karik,” nia katak.
Prezidente CCI Munisipál Bobonaro, Mafalda Santina, husu partisipante sira atu aproveita oportunidade ne’e ho di’ak, tanba formasaun ne’e importante tebes ba setór privadu sira hodi dezenvolve sira-nia atividade.
“Ita hakarak hadi’a povu ida-ne’e nia moris, sé ita la akompaña sira, ita ko’alia de’it, ko’alia de’it oinsá sira atu susesu,” nia hateten.
Enkuantu totál partisipante feto no mane ne’ebé tuir formasaun ne’e hamutuk na’in-16.
Notísia relevante: IADE fasilita formasaun buka ideia negósiu ba joven 25 iha Bobonaro
Jornalista: Sérgio da Cruz
Editór: Evaristo Soares Martins
