DILI, 03 outubru 2023 (TATOLI) – Diretór Servisu Saúde Munisípiu Aileu, Manuel de Jesus, informa moras Infesaun Vias Respiratória Aguda (ISPA), rejista, iha agostu, ho totál 17.223.
“Durante agostu ne’e, moras Infesaun Vias Respiratória aguda mak ita rejista aas iha Aileu hamutuk 17.223 ne’ebé afeta ba ema boot no labarik kiik sira”, Manuel de Jesus informa ba TATOLI via telephone, ohin.
Nia esplika, moras ISPA ne’e nia kauza mai husi klima hanesan rai rahun, tanba haree katak agora tempu bailoron, entaun ho ida-ne’e mak halo populasaun sira hetan moras ne’e.
“Ita haree tempu bailoron ne’e moras ne’e mosu barak hanesan isin manas, mear, inus metin, ida-ne’e ita diagnosa hotu ba Infesaun Vias Respiratória”, nia afirma.
Nia hateten, kona-ba tratamentu hosi profisionál saúde sira uza aimoruk ba isin manas, inus metin no mear, mak parasetamol, multivitamina ho sarope mear nian.
Prevensaun mak profisionál saúde kontinua halo promosaun saúde iha nivél fasilidade hotu no sentru saúde ba to’o postu no ba to’o iha SISCA.
“Ita fó orientasaun ba pesoál saúde para antes hala’o atividade SISCAS 15 to’o 20 menutu ne’e ho promosaun saúde, relasiona ho númeru moras ne’ebé makas. Tanba prevensaun importante mak ema hotu tenke uza maskara bainhira ba fatin ruma tanba rai uut makas no antes atu han tenke fase liman depois tenke halo ijiéne pesoál ne’e importante tebes”, nia haktuir.
Moras ne’ebé rejisa aas iha Munisípiu Aileu ne’e mai husi sentru saúde Laurala, Lequidoe, Remixiu no Aileu Villa inklui husi postu saúde 15 no postu tratamentu 16 no SISCA 33.
Profsionál saúde ne’ebé mak hala’o kna’ar iha Munisípiu Aileu hamutuk 200-resin, husi númeru ne’e, médiku 16, parteira 36, enfermeiru 46 inklui tékniku aliadu sira.
Jornalista : Felicidade Ximenes
Editór : Zezito Silva
