iklan

EKONOMIA, HEADLINE

Ministru Francisco Monteiro partisipa konferénsia petróleu internasionál iha Abu Dhabi

Ministru Francisco Monteiro partisipa konferénsia petróleu internasionál iha Abu Dhabi

Ministériu Petróleu no Rekursu Minerál, Francisco da Costa Monteiro. Imajen Tatoli/Francisco Sony

DILI, 03 outubru 2023 (TATOLI)-Ministériu Petróleu no Rekursu Minerál, Francisco da Costa Monteiro, reprezenta Timor-Leste partisipa iha expozisaun no konferénsia petróleu internasionál iha Abu Dhabi (ADIPEC, sigla inglés) hosi loron 02 to’o 05 outubru 2023.

Governante partisipa reuniaun nível a’as ne’e, bazeia ba konvite hosi Ministru Enerjia no Infraestrutura hosi Emiradu Árabe Unidu (EAU), Suhail Mohamed Faraj Al Mazrouei. Eventu signifikante ne’e realiza ho patrosíniu hosi Prezidente EAU, Sheik Mohammed bin Zayed Al Nahyan.

“Previléjiu reprezenta Timor-Leste iha fórum altu nível no diskusaun meza redonda. Atende mós enkontru nível ministru hosi rejiaun Ázia, Europa, Áfrika no Amérika Súl no Norte liu sanulu. Aleinde ne’e, marka mós presenza hosi Xefe organizasaun internasionál sira inklui hosi OPEC hodi partisipa iha diskusaun kona-ba regra hosi Chatam House. Regra ne’ebé regula katak partisipasaun hosi reuniaun bele uza informasaun ne’ebé mak nia hetan iha reuniaun ne’e, maibé labele lekar ba ema seluk ne’ebé mak komenta,” Ministru hateten liuhosi nota ne’ebé Agência Tatoli asesu, tersa ne’e.

Notísia relevante : Empreza xineza iha interese investe iha área explorasaun mina no gás

Tema sentrál iha diskusaun ne’e mak importánsia hosi tranzisaun enerjétika iha dezenvolvimentu ekonómiku, kresimentu no avansu sósiu ekonómiku.

Nune’e, Ministru Monteiro subliña importánsia ba rekoñesimentu gás naturál hanesan parte ida hosi tranzisaun enerjétika krusiál tanba emisaun karbonu ki’ik liu.

Nia afirma mós katak, nasaun hanesan Timor-Leste tenke explora no dezenvolve nafatin gás naturál atu nune’e bele kontribui konsideravelmente ba nesesidade ajustamentu ritmu relasiona ba konstrusaun sósiu ekonómiku kada nasaun.

Iha diskursu abertura iha eventu ne’e, Prezidente dezignadu ba Konferénsia Nasaun Unida kona-ba Mudansa Klimátika (COP28) no Ministru ba Indústria no Teknoloijia Avansada, hosi EAU, Sultan Ahmed Al Jaber deklara katak, fó konfiansa totál ba realizasaun konferénsia refere.

“ADIPEC iha Abu Dhabi, há’u fó kofiansa totál katak, indústria ne’e bele no tenke ajuda buka solusaun. Kleur ona indústria ida-ne’e konsidera hanesan parte hosi problema tanba indústria ida-ne’e la halo buat naton iha kazu balun, dala ruma blokeia progresu. Nune’e, eventu ida-ne’e hanesan oportunidade atu hatudu ba mundu katak, ita sai sentru fundamentál ba solusaun,” nia akresenta.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!