DILI, 7 outubru 2023 (TATOLI) — Diretór Nasionál Saúde Publika, Filipe Nerio Machado, hateten husi jullu no agostu, Ministériu Saúde rejista kazu dengue ne’ebé afeta ba labarik sira hamutuk 272.
“Durante fulan jullu to’o agostu ita rejista ona moras dengue iha teritóriu nasionál hamutuk 272, husi númeru ne’e la iha mate”, Filipe Nerio Machado informa iha nia ka’ar fatin Caicoli, ohin.
Husi kazu sira ne’e, munisípiu ne’ebé rejista kazu dengue mak Baucau hamutuk 17, Bobonaro neen, Dili 215, Ermera ualu, Liquiça 21, Manatuto rua no Viqueque tolu ne’ebé afeta ba labarik idade tinan ida to’o 15.
Nia esplika, kazu hirak ne’e maioria relata husi Munisípiu Dili, liuliu iha Postu Administrativu Dom Aleixo ne’ebe afeta mós ba labarik idade tinan ida to’o 15.
“Durante ne’e ita mós halo sensibilizasaun ba ita-nia komunidade sira no ita mós halo kontrolu ba susuk hirak ne’e iha nivél nasionál, agora daudaun ita lao hela atu evita ba udan monu rai tanba ita kompara udan monu rai iha tinan hira liubá tendénsia kazu ne’e sa’e”, nia hateten.
Nia haktuir, MS nafatin halo sensibilizasaun ba komunidade hodi prevene ba moras ida ne’e tanba daudaun ne’e besik ona udan monu rai oinsá bele fahe abate ba komunidade sira
“Ita mós sei halo fomigasaun bainhira iha fatin balun ne’ebé mak konsege relata kazu pozitivu konfirmadu dengue, entaun ita sei halo fomigasaun ba área refere tanba ita-nia aimoruk kímiku hirak ne’e ita-nia estoke sufisiente hodi hatan iha futuru”, nia konklui.
Tuir dadus, janeiru to’o setembru, Ministériu Saúde rejista moras dengue hamutuk 1.751, husi númeru ne’e óbitu na’in-hitu.
Jornalista : Felicidade Ximenes
Editór : Zezito Silva
