INSPTL-UNICEF disponibiliza formasaun ba pesoál saúde kona-ba desinformasaun
DILI, 09 outubru 2023 (TATOLI) – Institutu Nasionál Saúde Públika iha Timor Leste (INSPTL) hamutuk ho UNICEF fó formasaun ba pesoál saúde iha nivél nasionál hodi reforsa kapasidade Ministériu Saúde kona-ba desinformasaun iha Timor-Leste.
“Ohin ita fó kapasitasaun ba pesoál saúde sira iha nivél nasionál liuliu iha servisu sentrál Ministériu Saúde no mós Institutu Nasionál Saúde Publika ho objetivu atu hasa’e pesoál saúde sira-nia kapasidade atu mellora di’ak liubá resposta hasoru informasaun sira ne’ebé mak dalaruma bele dirije sala, ita-nia komunidade nia komportamentu ba saúde nian”, Diretór Jerál Tékniku Sientífiku INSPTL, Frederico Bosco, dehan ba jornalista sira iha Timor Plaza, ohin.
Nia dehan, ho kazu ida-ne’e bele ko’alia kona-ba desinformsaun no mós tempu sira hanesan Covid-19 liubá, Timor-Leste hasoru situasaun hanesan infodémiku ho ida-ne’e mak atu prepara di’ak liután, pesoál saúde sira-nia kapasidade atu responde situasaun sira-ne’e, entaun INSPTL servisu hamutuk ho parseiru sira hanesan USAID, UNICEF, DFAT hodi bele apoiu iha prosesu kapasitasaun ida-ne’e.
“Ho kapasitasaun ida-ne’e ita halo uluk ba pesoál saúde sira iha nasionál durante semana ida, depois mak ita-nia ekipa sira iha nasionál sei habelar fila fali ba profisionál saúde sira iha munisípiu hotu”, nia informa.
Nia esplika, pesoál saúde sira ne’ebé mak tuir formasaun ida-ne’e mai husi Departamentu Promosaun Edukasaun, Diresaun Nasionál Saúde Materna Infantil, responsável ba media komunikasaun, protokolu iha MS no mós envolve INSPTL liuliu Diresaun Nasionál Formasaun no Vijilánsia.
Iha fatin hanesan, Reprezentante UNICEF iha Timor-Leste interinu, Ainhoa Jaureguibeitia, dehan Institutu Nasional Saúde Públika organiza treinamentu kona-ba reforsu kapasidade Ministériu Saúde kona-ba desinformasaun iha Timor-Leste.
Nia afirma, bainhira ema hakarak buka informasaun oioin hodi hetan resposta, espesialmente moras ne’ebé habelar daudauk hanesan moras foun, susar tebes, plataforma balun ne’ebé uza atu asesu ba informasaun hamosu informasaun falsu no avizu ne’ebé dala barak hamosu ta’uk, konfuzaun no ta’uk iha ema nia leet. Aleinde ne’e, infodemia ida bele rezulta hahalok-aat no risku entre ema.
“Iha Timor-Leste, ta’uk ne’ebé kria husi informasaun ne’ebé la loos ka desinformasaun, kontribui maka’as ba númeru tun kona-ba ema ne’ebé asesu ba servisu saúde esensiál sira hanesan servisu saúde inan no labarik, servisu imunizasaun, servisu planeamentu familiár no tratamentu ba má nutrisaun”, nia haktuir.
UNICEF sente orgullu atu apoia formasaun ne’e iha Timor-Leste hodi kapasita Ministériu Saúde iha nivél nasionál no sub-nasionál. Ne’e signifika katak nu’udar akompañamentu ba treinamentu ne’e, UNICEF sei apoia treinamentu ba Ofisiál Saúde Públika Munisipál husi ekipa Promosaun Saúde, jestór sira husi programa imunizasaun no pontu fokál sira husi ospitál munisipál no sentru saúde komunitária sira.
“Ami halo estimasaun katak ema liu 150 sei hetan benefísiu husi treinamentu ne’e iha nasaun laran tomak”, nia adianta.
Husi formasaun ida-ne’e, espera katak Ministériu Saúde sei ofisialmente lansa Grupu Traballo desinformasaun atu sira servisu sistematikamente no lalais hodi responde ba desinformasaun ka informasaun la loos.
Nia agradese ba parseiru USAID no DFAT, ne’ebé kontinua no konsistente aumenta ona apoiu finanseiru no tékniku hodi hadi’ak estatutu saúde labarik sira-nian ho sira-nia komunidade iha Timor-Leste.
Jornalista : Felicidade Ximenes
Editór : Zezito Silva
