DILI, 09 outubru 2023 (TATOLI) – Diretór Nasionál Saúde Publika, Filipe Nerio Machado, informa moras Infesaun Vias Respiratória Aguda nia kauza mai husi ambiente ne’ebé mak la moos.
“Moras ISPA nia kauza los mak ambiente ne’ebé mak la moos iha sosiedade, ita haree katak agora tempu bailoron, anin boot halo rai rahun maka’as, entaun fó impkatu ba infesaun respiratóriu ne’ebé mak iha. Tanba tuir dadus hatudu katak komunidade sira ne’ebé mak iha uma hodi tein ho ai-sunu, ida-ne’e mós implika ba moras respiratóriu aguda refere”, Filipe Nerio dehan iha nia kna’ar fatin, ohin.
Nia subliña, Minsitériu Saúde rejista iha jullu no agostu, moras Infesaun Vias Respiratória Aguda (ISPA) iha fasilidade saúde iha teritóriu nasionál hamutuk 73.590. Husi númeru ne’e afeta ba labarik no mós ema boot sira.
“Ita hotu hatene katak husi fulan jullu no agostu, ita rejista moras ne’e iha fasilidade saúde iha teritóriu nasionál, ne’ebe afeta ba labarik no mós ema boot, maibé kazu ne’e barak liu akontese ba labarik ho idade tinan liman ba to’o idade 25”, nia relata.
Nia haktuir, dadus ne’ebé mak relata husi nivél munisípiu mai nasionál katak Infesaun Vias Respiratória Aguda, diarea no moras kulit, entaun nia kauza husi ambiente ne’ebé mak ladún ijiene.
Kona-ba prevensaun, Diresaun Nasionál Saúde Públika, husi Depratmentu Promosaun Edukasaun husu nafatin ba komunidade ne’ebé de’it uza maskara hodi evita rai rahun no atu halo prevnsaun, la’os de’it ba ISPA, maibé ba moras sira seluk hanesan moras diárea no moras kulit presiza tau atensaun ba ambiente sira.
“Ita nafatn halo sensilbilizasaun, halo edukasaun, promosaun kona-ba ijiene nian tanba ita-nia komunidade atu adopta atitude ne’ebé mak saudavél, entaun presiza ema hotu nia kontribuisaun ida-ne’e importante tebes”, nia afirma.
Kona-ba taramentu moras sira-ne’e, profisionál saúde konsege fó tratamentu ho di’ak iha fasilidade saúde sira iha teritóriu nasionál.
Jornalista : Felicidade Ximenes
Editór : Zezito Silva
