DILI, 10 outubru 2023 (TATOLI) – Sekretariadu Tékniku Administrasaun Eleitorál (STAE) rejista ona observadór ba eleisaun komunitária ne’ebé kompostu husi nasionál neen no internasionál tolu mak husi embaixada Malázia, Filipina no g7+.
Diretór-Jerál STAE, Acilino Manuel Branco, dehan observadór nasionál mak Fundasaun Mahein, Fundasaun Pátria, Organizasaun Naun-Govenamentál Belun, Caucus, Raes Hadomi Timor Oan no g7+ Timor-Leste.
“Observadór internasionál no nasionál rejistu ona iha STAE hodi hetan kartaun emite atu halo observasaun ba eleisaun suku iha fulan ne’e”, Acilino Branco dehan ba Tatoli iha nia knar fatin, Caicoli, Dili, segunda ne’e.
Eleisaun hodi hili xefe suku no konsellu suku ba períodu 2023-2030 sei realiza iha 28 outubru 2no STAE rekruta ofisiál eleitorál 2.675 iha territóriu hodi apoia sufrájiu ne’e.
Ministru Administrasaun Estatál (MAE), Tomás Cabral, dehan eleisaun suku tinan ne’e Governu aloka miliaun $8 no montante ne’e sei kobre mós ba atividade seguransa nian.
“Ida ne’e ita tenke investe tanba observadór internasionál mós iha ne’e. STAE agora emite hela kartaun kredensiál ba sé mak atu halo nia papél observasaun”, dehan.
Orsamentu ba preparasaun eleisaun suku nian mai hosi dotasaun todu Governu tanba hakarak realiza sufrájiu ho demokrátiku, nune’e Estadu tenke investe osan.
Timor-Leste daudaun iha aldeia 2.233, suku 452 no postu administrativu 67. Iha eleitór hamutuk 893.838 ne’ebé kompostu husi mane 464.400 no feto 429.438.
Notísia relevante: STAE rekruta ofisiál eleitorál 2.675 apoia eleisaun suku
Jornalista: Osória Marques
Editora: Maria Auxiliadora
