DILI, 11 outubru 2023 (TATOLI) – Konsellu Ministru aprova asinatura akordu entre Timor-Leste no nasaun sira ne’ebé halo parte iha ASEAN kona-ba livre vistu fins turístiku nian.
Proposta ba asinatura akordu ne’e aprezenta husi Vise-Ministra ba Asuntu ASEAN, Milena Rangel.
“Akordu sira ne’e asina ona husi kada Estadu-membru ASEAN nian, no sei permite ba sidadaun Timor-Leste nian no nasaun hirak ne’e, bainhira halo viajen bá territóriu Estadu signatáriu seluk, sei benefísia husi livre vistu ho períodu másimu loron 30 ba fins turístiku”, dehan komunikadu husi Governu.
Vise-Ministra Asuntu ba ASEAN hatete Timor-Leste sei halo negosiasaun kona-ba akordu esesaun vistu ho nasaun neen.
“Konsellu Ministru aprova ona proposta atu asina akordu ho nasaun ASEAN sira ba esesaun vistu durante loron 30. Ne’e hanesan parte ida husi kritériu mapa estrada nian no ida ne’e mak atu negosia esesaun vistu ba diplomata, traballadór no turista sira. Desizaun Konsellu Ministru nian permite tékniku sira atu hahú negosiasaun kona-ba esesaun vistu ho Estadu-membru ASEAN sira seluk”, Milena Rangel dehan ba Tatoli.
Governante ne’e esplika katak nasaun sira ASEAN nian mak Brunei Darussalam, Kamboja, Indonézia, Laos, Malázia, Myanmar, Filipina, Singapura, Tailándia no Vietnam.
“Ita iha ona ho Indonézia, Kamboja, Singapura, Malázia, sira seluk ne’ebé ita tenke servisu liután iha negosiasaun, tanba ida ne’e hanesan parte ida husi ita-nian mapa estrada atu tama ba ASEAN”, dehan.
Jornalista: Osória Marques
Editora: Maria Auxiliadora
