Klubu Emiradu Árabe kontrata jogadór timoroan na’in-rua ho saláriu fantástiku

BAUCAU, 11 outubru 2023 (TATOLI) – Klubu Emiradu Árabe Unida, Fujairah, kontrata jogadór timoroan na’in-rua ho durasaun kontratu tinan rua hodi reforsa klubu refere iha kampeonatu UAE Pro League.
Jogadór futeból na’in-rua ne’e hosi munisípiu Baucau ho naran Noberto no Ario Ximenes.
Jogadór Noberto Olívio da Costa (19), moris fatin Baucau iha loron 16 outubru tinan-2004 no Ario Melio Ximenes (17), moris Baucau iha loron 20 maiu 2006.

Jogadór na’in-rua ne’e kontrata ho durasaun tinan-rua ho valór orsamentu rihun $600 ho saláriu kada fulan rihun $25 inklui bonus rihun $10.
Enkuantu iha akordu kontratu prevee mós kona-bá valór vensimentu sira-ne’e hotu válidu bainhira parte rua hahú asina akordu liuhosi kontratu entre jogadór ho klubu.
“Urgullu no kontente tebes ho oportunidade ne’ebé hetan, ami sei hatudu prestasaun no disiplina,” Ario Ximenes hateten hafoin despede ho Autoridade Administrasaun Munisipál Baucau, Vila Nova, kuarta ne’e.
Ario Ximenes, promete reforsa klubu Fujairah nune’e hamorin Timor nia naran espesialmente munisípiu Baucau.
Treinadór sentru futeból juvenil munisípiu Baucau, Ubaldo Moreira, sente urgullu tanba sentru treinamentu futeból juvenil Baucau prodús ona jogadór ne’ebè hetan kontratu iha klubu internasionál hanesan Noberto no Ario.
“Sira na’in-rua treinu hosi kiik entre tinan 12, prosesu kleur to’o idade 17 konsege tuir formasaun iha Brazil, hetan prestasaun diak ikus mai hetan tán kontratu iha Fujairah,” Vidal Moreira hateten.
Jogadór nain-rua ne’e iha inísiu tinan 2023 hala’o formasaun futeból besik tinan-ida iha Brazil ne’ebé apoia hosi Sekretaria Estadu Juventude no Desportu (SEJD).
Tuir planu jogadór na’in-rua ne’e sei aranka ba Emiradu Árabe iha loron sesta, 13 fulan-outubru 2023.
Fujairah FC lokaliza iha Dubai, Emiradu Árabe. Klubu ne’e funda iha tinan 1968 no oras ne’e kompete iha primeiru divizaun UAE Pro League.
Estádiu ka arena hosi klubu ne’e ho naran Fujairah Club Stadium. Oras ne’e UAE Pro League tama ona jornada dalima.
Fujairah okupa tabela klasifikasaun 12 iha jornada dalima ho pontu haat, tanba lakon dala-tolu, manán dala-ida no empata dala-ida.
Mohammed bin Hamad bin Mohammed Al Sharqi mak oras ne’e nu’udar Prezidente Fujairah FC.
Enkuantu tabela klasifikasaun dahuluk okupa hosi Al Urooba ho pontu 15 hosi jornada dalima, katak jornada dala-lima ne’e manán hotu kedas.
Jogadòr timoroan na’in-rua nee sei aprende tátiku bodi treinadór Mohammed Al Hosani durante tinan rua iha sidade Dubai, Emiradu Árabe.
Jornalista : Natalino Belo
Editór : Evaristo Soares Martins

