iklan

HEADLINE, SAÚDE

Ekipa Médiku Siloam Jakarta halo riku koñesimentu profisionál saúde

Ekipa Médiku Siloam Jakarta halo riku koñesimentu profisionál saúde

Imajen Tatoli/Felicidade Ximenes

DILI, 14 outubru 2023 (TATOLI) – Xefe Sesaun Asuntu Apoiu no Médiku Ospitál Siloam Jakarta Indonézia, rick  Suhardhi, fó semináriu ba profisionál saúde sira iha Hospitál Nasionál Guido Valadares (HNGV) atu bele fó asisténsia saúde ne’ebé di’ak ba pasiente sira.

Erick Suhardhi, hatete objetivu mai Dili, atu hametin koloborasaun ho profisionál saúde iha HNGV atu bele aumenta sistema seguransa ba pasiente ho di’ak liután.

“Ami husi Ospitál Siloam, Ospitál Lippo Village, ami iha ne’e atu hametin koloborasaun hamutuk ho profisionál saúde sira iha HNGV oinsá atu bele aumenta sistema seguransa ba pasiente ho di’ak”, Erick Suhardhi informa iha HNGV, ohin.

Nia esplika, ho kooperasaun entre Governu Timor-Leste ho Siloam Jakarta atu ba oin bele iha relasaun ne’ebé mak amizade.

“Semináriu ida-ne’e bele aumenta kooperasaun di’ak entre Governu TL no Hospitál Siloam, atu ba futuru bele iha relasaun ne’ebé di’ak, nune’e médiku sira balun presiza atu konsulta ba kazu sira difisíl, bele kontatu ami atu bele ajuda”, nia hateten.

Ekipa Médiku Ospiál Siloam Jakarta mai ho espesialidade sira hanesa kardiolojista surgery, Neuro Surgery no onkolojista.

Iha fatin hanesan, Diretór Klíniku HNGV Marcelino Correia, informa husi ekipa médiku ida-ne’e nia presenza atu fó esperiénsia no motivasaun ba médiku sira kona-ba operasaun moras.

“Ekipa sira-ne’e mai fahe sira-nia esperiénsia no fó motivasaun ba ita-nia médiku sira atu bele atende kazu sira ba operasaun nian. Entaun sira aprezenta kazu sira ne’ebé mak sira atende iha Ospitál Siloam no sira mós hatudu ita-nia pasiente ne’ebé mak durante ne’e hala’o tratamentu iha ne’eba, entaun ida-ne’e sira mai HNGV hodi haree direta ba pasiente no ospitál mak hanesan sentru hodi haruka moras ba rai liur”, Correia relata.

Nia haktuir, ho formasaun ne’e importante tebes tanba ba oin HNGV sei haruka médiku sira ba  kontinua aprende sub espesializasaun iha ospitál Siloam Jakarta atu bele halo atendimentu ne’ebé mak di’ak liután.

“Husi sira-nia parte prontu atu apoiu ita-nia médiku sira atu aprende no foti sub-espesializasaun iha ne’eba atu aprende buat ne’ebé mak sira hanorin iha Siloam hodi mai prátika iha ita-nia ospitál hodi fó atendimentu ne’ebé di’ak”, nia informa.

Nune’e, Médiku Espesialista Kardiaku Herculano Seixa, dehan ekipa sira husi Siloam Jakarta mai fahe sira-nia esperiénsia no guia tratamentu liga ho operasaun fuan, válvula no troka uat sira.

“Sira ohin aprezenta fila fali kazu sira ne’ebé sira halo operasaun ona hanesan ba neuro sirurgy kona-ba guia tratmanetu foun sira oinsá halo operasaun ba pasiente sira ne’ebé mak ho problema kankru no fuan”, Seixa esplika.

Nia realsa, husi ekipa Siloam Jakarta nafatin apoiu profisionál saúde sira iha HNGV atu eleva nafatin kapasidade médiku sira-nia ba kazu krítiku sira.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!