Universidade Fudan eskolle estudante rua tuir konferénsia lejislativa saúde iha Xina
DILI, 14 outubru 2023 (TATOLI) – Diresaun Asuntu Akadémiku Universidade Fudan, hili estudante rua husi Timor-Leste, ne’ebé estuda iha Xina hodi tuir konferénsia lejislasaun saúde iha salaun Konferénsia iha Kongresu Povu Munisípiu Shanghai.
“Diresaun Asuntu Akadémiku Universidade Fudan, hili estudante na’in-rua husi Timor-Leste, Esmeraldito Ferreira ho naran Xina (Fei Rui Ta) no Terezinha Alvensia Detra Freitas Alves ho naran Xina (Ta Rui Zi), hamutuk ho estudante médiku na’in-neen seluk ne’ebé reprezenta sira-nia universidade hodi tuir konferénsia lejislasaun saúde nian, ne’ebé hala’o iha salaun konferénsia iha Kongresu Povu Munisípiu Shanghai”, dehan iha nota ne’ebé TATOLI asesu, ohin.
Tuir estudante timoroan iha Xina, Esmeraldito Ferreira, hafoin partisipa iha atividade hateten, sente previlejiu boot ida tanba bele rona no halo diskusaun direta husi Lidér Shanghai nian, liuliu iha área saúde ne’ebé mak agora estuda ba.
“Ha’u sente previlejiu boot tanba iha konferénsia ne’e foka liubá dezenvolvimentu no mudansa iha área saúde husi tempu uluk no agora, hanesan mundu teknolojia nian, entaun liuhosi konferénsia ne’e mós ami tun direta ba Shanghai Museum of Urban Planing hodi haree direta retratu informasaun kona-ba dezenvolvimentu no mudansa iha Cidade shanghai uluk to’o agora nian”, Esmeraldito Ferreira esplika.
Rezultadu husi eventu ne’e, hanesan partisipante no estudante estranjeiru mai husi nasaun ne’ebé mak la hanesan, entaun ho diskusaun ida-ne’e bele aprende no atu implementa iha ida-idak nian nasaun hanesan kontribuisaun ba dezenvolvimentu nasionál.
“Ami estudante timoroan ne’ebé eskola iha China hanesan Embaixadór Juniór iha ami ida-idak nia eskola no sempre lori T-Lesteimor nia naran hodi tuir atividade oioin hanesan atividade akadémika, kulturál no atividade internasionál hanesan exchange program no one belt one road program. No saida de’it maka ami aprende iha ne’e, ami espera sei implementa iha Timor-Leste hodi kontiribui ba dezenvolvimentu rai doben Timor-Leste liuhosi ami ida-idak nia área”, nia afirma.
Sorumutu ida-ne’e hala’o entre reprezentante sira husi estudante médiku sira, husi universidade médiku tolu iha Shanghai hanesan Universidade Fudan, Universidade Jiaotong no Universidade Medisina Xina iha Shanghai no membru sira husi Komisaun Permanente Kongresu Povu Munisípiu Shanghai nian.
Sorumutu ne’e inklui mós prezidente KomisaunÉtika no Medikamentu Xina nian iha rai-li’ur no Komisaun Negósiu Estranjeiru Kongresu Povu Munisípiu nian, husi diskusaun ne’e foka liubá asuntu lejislativu sira ne’ebé relasiona ho setór saúde iha Shanghai.
Husi diskusaun ne’e kobre tópiku oioin relasiona ho lejislasaun saúde iha Shanghai. Área prinsipál balun husi diskusaun ne’e inklui proposta atu hadia edukasaun médika no formasaun, hasa’e infraestrutura saúde nian no hatán ba preokupasaun saúde públika nian.
Tanba ne’e, partisipante sira halo mudansa reguladór potensiál ho objetivu atu promove asesibilidade, kualidade no asesibilidade ba rezidente sira iha Shanghai. Esforsu kolaborativu ida-ne’e entre reprezentante estudante médiku sira no membru lejizlativu sira reflete aprosimasaun proativu ida hodi responde ba nesesidade saúde sira ne’ebé envolve iha sidade ho nia populasaun.
Estudante Esmeralito Ferreira hanesan estudante finalista ne’ebé agora daudaun hala’o internship ka prátika iha Huashan Hospitál no Terezinha hanesan estudante Terceiro Ano.
Jornalista : Felicidade Ximenes
Editór : Zezito Silva
