Estoke ran menus afeta ba pasiente
DILI,17 outubru 2023 (TATOLI) – Xefe Banco de Sangue iha Hospitál Nasionál Guido Valadares (HNGV),Cladio Julio Quintão, informa estoke ran, daudaun ne’e, menus tanba ne’e difikulta atu atende ba pasiente sira.
“Agora daudaun estoke ran iha Banco de Sangue menus duni, tanba iha fulan ida-ne’e nia laran ami halo transfunzaun ran ba pasiente sira ho númeru boot, ne’ebe mai husi ospitál referrál, sentru saúde sira mai HNGV, entaun ida-ne’e difikulta tebes tanba ran la iha”, Cladio Julio Quintão, dehan iha nia kna’ar fatin Bidau Tokobaru, ohin.
Nia dehan, iha fulan outubru nia laran, ema voluntáriu la iha atu mai apoiu ran ida-ne’e mak halo estoke ran mamuk, entaun ida-ne’e so família de’it mak apoiu maibé seidauk sufisiente.
“Entaun ami halo ona aproximasaun ho Governu, organizasaun atu halo doasaun ran ba ita, tanba ho aproximasaun ba instituisaun barak mak iha rezutadu pozitivu iha meadu novembru mak foin sira halo doasaun ran”, nia informa.
Nia afirma, Banco de Sangue durante ne’e halo kooperasaun ho CVTL hodi apoiu voluntáriu sira ba transfunzaun ran.
Tanba ne’e, nia husu ba públiku atu apoiu ran turuk ida mai hodi bele atende ba pasiente sira ne’ebé mak presiza ran hodi bele salva nia moris.
“Ha’u husu ba públiku no ba parte hothotu iha instituisaun, voluntáriu, ema individu ida idak, atu mai fó ran, ita fó karidade ida hodi salva ba pasiente ne’ebé mak presiza ran, tanba ita-nia ran turuk ida bele salva ema-nia vida”, nia subliña.
Estoke ran iha Banco de sangue, kontribui husi ema voluntáriu hamutuk 10, husi ne’e ran tipu A lima, B 1, tipu O haat no estoke AB ho B mamuk.
Jornalista : Felicidade Ximenes
Editór : Zezito Silva
