MJDAK apoiu $10.000 El-Matador-Asalaino ‘’Fight Night’’ selebra 12 Novembru
DILI, 19 outubru 2023 (TATOLI) – Ministériu Juventude Arte no Kultura (MJDAK) apoiu orsamentu hamutuk $10.000 ba klube Boxe rua hanesan El-Matador Boxe no Asalaino Boxe atu realiza Fight Night hodi komemora Loron Nasionál 12 Novembru.
“Agradese ba Governu liuliu MJDAK ne’ebé apoiu ona ami ho orsamentu hamutuk $10.000 hodi realiza eventu Boxe durante loron tolu, hahú loron 10-12 novembru no atividade ne’e ita sei hala’o iha Jináziu Dili”, Prezidente Klube El-Matador, Abilio ba Agência TATOLI iha Faról, ohin.
Atividade ne’e sei envolve Boxista hotu iha klube Boxe idaidak iha kapitál Dili no sei konvida mós Boxista hosi nasaun viziñu Indonézia mai kompete.
“Ita sei envolve Boxista kada klube na’in rua ou tolu, ita mós sei konvida Boxista hosi ita-nia nasaun viziñu Indonézia”, nia informa.
Tuir nia, orsamentu ne’ebé Governu oferese ba sira sufisiente ona atu realiza atividade ne’e ho intensaun atu hadia mentalidade Boxista sira-nian hodi ba kompete iha eventu internasionál sira.
Hosi orsamentu ne’ebé iha sei finansia ba atividade hotu, inklui selu árbitru, prémiu no sertifikadu ba atleta manán na’in sira ne’ebé kompete iha atividade ne’e.
Iha eventu ne’e, loke ba públiku maibé komisaun sei faan billete ba adeptu sira atu asesu maibé tenke hola billete hodi asiste direta iha jogu ne’e.
Jornalista: Hortencio Sanchez
Editór : Zezito Silva
