Edifísiu foun Tribunál iha Caicoli sei inagura iha dezembru

DILI, 20 outubru 2023 (TATOLI) – Prezidente Tribunál Rekursu Deolindo dos Santos, hateten edifísiu foun Tribunál Judisiál Primeira Instánsia Díli sei finaliza iha novembru no sei inagura iha dezembru tinan ne’e.

Nia dehan, kuandu obra Tribunál Díli kuase atu besik finaliza ona no tuir planu sei inagura iha tinan ne’e.

“Konstruisaun ba obra Tribunál Judisiál Primeiru Instánsia la’o hela, la kle’ur sei finaliza iha tinan n’e, tenke finaliza ona tanba Estadu gasta osan barak. Ha’u la promete maibé tuir saida hosi parte kompaña informa ona katak obra ne’e sei fializa iha fim novembru no dezembru ita inagura ona”, Deolindo dos Santos ba jornalista sira hafoin ensera kursu formasaun ba Juiz sira iha Hotel Timor, sesta ne’e.

Nia hateten, banhira edifísiu Tribunal Díli inagura sei utiliza iha 2024, tanba haree ba kondisaun no espasu Tribunál Díli atuál la permite atu ema uza hodi halo servisu.

“Tinan oin ita bele uza ona edifísiu ne’e tanba haree ba kondisaun no espasu Tribunál Díli atuál la permite para ema uza atu halo servisu”, nia informa.

Notísia relevante : Konstrusaun Edifísiu TDD atinji ona 27%

Konstrusaun edifísiu Tribunál Distritál Dili sei konklui iha maiu

Jornalista: Natalino Costa 

Editór : Zezito Silva