Wikas konklui manutensaun ró ida hosi Komponente Navál no ida seidauk
DILI, 25 outubru 2023 (TATOLI) – Ministru Defeza (MD), Donaciano Gomes Pedro ‘’Klamar Fuik’’, dehan Empreza Wikas finaliza ona manutensaun ba ró ida hosi Komponente Navál nian no ida ida sei iha prosesu.
“Ró rua, ida sei iha prosesu manutensaun, ida empreza finaliza ona 100% ona, ida fali iha ona prosesu ba finalizasaun, ita hein katak ró rua ne’e sei bele fila fali ba kondisaun estavél, atu Komponente Navál uza hodi servisu, liuliu halo operasaun iha tasi”, ministru hateten ba jornalista sira iha Palásiu Governu, ohin.
Tuir kontratu ne’ebé Governu halo ho Empreza Wikas katak ba manutensaun ró rua ne’e ho durasaun fulan sia maibé durasaun liu ona no kompaña husu atu halo estensaun maibé Governu seidauk foti medida tanba hein relatóriu hosi kompaña.
“Kontratu durante fulan sia, agora liu tia ona, sira husu atu estende maibé presiza hatama relatóriu para ita bele hatene hodi fó justifikasaun ne’ebé mak di’ak ba ita-nia Estadu”, nia relata.
Kustu ba manutensaun mai ho pakote ró rua, Jaco no Betano ne’e hamutuk millaun $2.
Notísia relevante : Falur: Manutensaun ró komponente navál besik konklui
Jornalista: Hortencio Sanchez
Editór : Zezito Silva
